1 Motong la Yesu iyei ne, “Au i awete pang nen nga, ngan be nen a lomim medana yo kataru pau i, in katte be. 2 Ngan ole tingangang a kakoo ye rumu kidi Yuda ke gaongo. Inbe pang dama ni be lal pombe nga, ngan ole di tooltool yo tiraumatamatang a kammata nga, ngan ole lodi tar nen be nga tiyei urata dook mata pang Maro. 3 Di ngan ole tiyei dada yo nen ngan pang, yesoo di ngan lodi galanga ye Tamak tiap, inbe lodi galanga yau tiap lapau. 4 Ngan au i be awete betanga nga pang, a be nen ngan ye kene yo be tiyei dada nen pang nga, ngan ole lomim tut ye so yo awete pang ye nga. Kulkulunu ngan awete pang ye so yo nga tiap, yesoo au i ayang tayepe.”

5 Motong la Yesu iwete mulu nen, “Nookoot nga au i be amulu a alo pang ye tool tani yo iwangau a asi i, bong ang nga sa itorau be alo pang ngai, ngan tiap. 6 Ang nga lomim modoko mai san ye betanga yo awete pang nga. 7 Bong awete pang moolmool nen, ngan dook mata be ayegang a alo, a nen ngan alonang. Yesoo, kumata le be alo tiap nga, ngan Loningi kiang tani in o isi tiap. Bong kumata le alo nga, ngan la be ayawari a isi pang yang nga. 8 Le ye kene yo be isi ye in nga, ngan ole ipagalanga di tooltool ke tana i lodi, le lodi galanga ye noonoo yo kidi nga, inbe ye dada dook mata noonoonoo yo ke Maro nga, inbe ye lal yo Maro itaru be iyemenai di tooltool ye i. 9 Ngan nen le ole ipagalanga lodi a be nen ngan lodi galanga be di ngan tiyei noonoo, yesoo di tooltool yo nen ngan titara lodi medana pau tiap. 10 Inbe ole ipagalanga lodi ye dada dook mata noonoonoo ke Maro, yesoo au i atoo dada noonoonoo ki le nga be alo pang ye Tamak, ngan ole ke be kakamatau mulu tiap. 11 Inbe ole ipagalanga lodi lapau ye lal yo Maro itaru be iyemenai di tooltool ye i, yesoo tool kuto mai yo matan kala tana i, in Maro ipaposi ye urata dook tiap ki yo iyeii i, in oo, le ole iyemenaii ye.

12 “Au i betanga kiau alunu san la lok be awete pang ye nga, bong nookoot nga ole imoo pang be lomim galanga ye nga. 13 Bong ye kene yo be Maro Amunu be isi a si ipapos betanga moolmool ke Maro nga, ngan ole ipasongosongang ye betanga tina yo moolmool nga. Le betanga yo be iwete pang ye nga, ngan iwete sokoraia sa ye ya taunu lono tiap, bong ole iwete pang ye betanga yo ilongo ye Tamak nga, inbe ole iwete pang ye soo so yo be pang dama ni ngan pombe nga. 14 Ya in ole ikap betanga yau, lo ngan be iwete pang, a nen ngan ye dada yo iyeii nen i, in ole iyeie ek le ilo ete ke be di tooltool tipayitau ye. 15 Ngan so le imot yo ke Tamak nga, ngan kiau. Ngan la le awete pang be Maro Amunu ole ikap betanga yau, lo ngan be iwete pang nga.”

16 Motong la Yesu iwete pang di mulu nen, “Ole tayepe le mooloo tiap, ngan ole kakamatau mulu tiap. Lo ngan be kayepe kasin, ngan ole kakamatau mulu.”

17 Ngan tina Yesu iwete nen a di galiunu tilongo nga, le nga di tapdi tipartortor. Tiyei ne, “Ai, betanga yo iweta paidi i, in punu belei? Iyei ne, ‘Ole tayepe le mooloo tiap, ngan ole kakamatau mulu tiap. Lo ngan be kayepe kasin, ngan ole kakamatau mulu.’ Inbe iwete mulu nen, ‘Ngan nen, yesoo nga be alo pang ye Tamak.’ Ngan yo iwete nen nga, ngan betanga ki in punu belei?” 18 Le nga di galiunu tina ngan tipartortor mulu nen, “Ai, betanga yo iwete be ole tayepe le mooloo tiap i, in punu belei? Idi nga lod sarere ye soo so yo iwetewete ye i.”

19 Yesu di galiunu tina ngan di tapdi tiwetewete nen nga, ngan ikamata di le lon galanga ben ole titoru ye betanga tina. Le nga iwete pang di nen, “Ang ngan kator panin di diemim ye betanga yo awete pang nen, ‘Ole tayepe le mooloo tiap, ngan o ke be kakamatau mulu tiap. Lo ngan be kayepe kasin, ngan ole kakamatau mulu.’ 20 Awete pang moolmool nen, ang nga ole lomim modoko, inbe katang, bong di tooltool ke tana i nga, ngan ole lodi ponana. Moolmool, ang nga ole lomim modoko, bong lo modoko kiang tani in ole palbe leu be iportak le iyei ben lo ponana. 21 Le dawa ben garup yo lal ki ke pasuiungu ngan kapon massingi ye kase a be ipasuiu i. Bong ye kene yo be ipasuiu kase tani in koot nga, ngan ole lon kalli masngana, inbe lon ponana, yesoo ipasuiu kase tani in a isi tana oo. 22 Ngan gaongo leu ye ang nga lapau. Nookoot nga lal kiang be ole lomim modoko, bong ye kene yo be akamatang mulu ye in nga, ngan ole lomim ponana. Ngan lo ponana kiang tani in tool sa o ke be ilelang ye, ngan tiap. 23 Ye kene tani in nga, ngan ang nga o ke be museremim be katorau ye so sa, ngan tiap. Le awete pang moolmool nen, kumata le be kapatarau pang Tamak, inbe katoru ye soo so ye au ek nga, ngan ole ikauu pang. 24 Mukot a ise nga, ngan katoru ye so sa ye au ek, ngan pitiap. Le kator ngan ole kakap so, a nen ngan ole lomim ponana le lomim ponana kaiye.”

25 Yesu iwete nen a imot, motong la iyei ne, “Betanga yo awete pang nga, ngan akatte betanga ye leu. Bong pang dama ni be tagoro lal yo be pombe in nga, ngan ole awete pang nen mulu tiap, bong ole awete betanga mallangana pang ye Tamak. 26 Ye kene tani in nga, ngan au i ole akaua koomim, inbe apatarau pang Tamak a atoru be ilonang, ngan tiap, bong ang tapmim ole kapatarau panga ye au ek. 27 Ngan Tamak ya taunu in lono pang mai san, yesoo ang ngan lomim pau mai san le katara lomim medana pau be au i aye Maro amyepe, motong la asi nga. 28 Moolmool, au i apa ye Tamak la le asi tana i nga, le nookoot nga ole ayege tana i, inbe amulu a alo pang ye Tamak.”

29 Yesu iwete nen, motong la di galiunu tiyei ne, “Nookoot nga la kotte betanga tiap, bong kuwete betanga mallangana pam nga. 30 Le nookoot nga am nga lomam galanga nen, ong in lom galanga ye so nga le imot. Le ke be kunama tool sa be itorong ye torungu ki muku, lo ngan be kuraua torungu ki, ngan tiap. Ngan amkamata dada kiong yo nen i, le am nga amtara lomam medana nen, be ong in kuye Maro kayepe, motong la kusi nga.”

31 Tiwete nen, motong la Yesu iyei ne, “Nookoot nga la o katara lomim medana nga, too? 32 Bong kapalongo, lal tani yo awete pang ye be pombe i, in nookoot nga pombe oo. Le mooloo tiap ngan ole kamagirigiri a ang atu atu kakoo pang ye malala kiang. Inbe ole kawulai yau le au taleu la be si ayepe i. Bong au taleu tiap, yesoo Tamak la be iyepe yau i. 33 Ngan au i awete betanga yo nga pang, a be nen ngan kaman yau man kayepe ye lo silene yo kiau i. Ye kene yo be kayepe ye tana i nga, ngan ole urata moonoo dook tiap la be pompombe pang yang nga. Bong kakodo le kamede, yesoo gurana yo ke tana i, in allosi oo.”