1 Ngan betanga medana yo Maro ipamede muku i, in ger ki iwete pang di tooltool ye dada yo be tisung panga ye i, inbe ye badabada ke sungunu yo be tipatokodo a iken tana pono i. 2 Inbe badabada ke sungunu tani in tisokala le lono ru. Le lono yo ke dama in tiwete ene ye Ni Mison. Inbe lono tani in titara sul kene ipa ye kookoowoo ke tarungu so, inbe porong yo tiyei paroranga ye pang Maro nga. 3 Inbe badabada lono san ke moroko yo tiwona ye wam i, in tiwete ene ye Ni Mison Ki Taunu. 4 Ngan lono tani, in kookoowoo yo tikarata pang paroranga so yo kini ki dook mata, in iken ye. Ngan kookoowoo tani in tikarata ye pat dook mata yo ene gol i. Le kookoowoo tani in ipa ye koror yo tiduku lono le diki ki ye gol ngan iken ye badabada sokalanga tani. Ngan koror tani, in koror ke pamedenge betanga ke Maro pang di tooltool, le pat menmenngana yo Maro iwodo ger ki lo ye nga, ngan iken lono. Inbe koror tani, in bor atu yo tikarata ye gol a titar porong mana du iken lono, in ipa ye toto ke Aron yo so supana isudud ye i, in iken lono lapau. 5 Inbe ke koror tani in koonoo ke ete nga, ngan tikarata tomonai di so ru yo tiyepe ye malala ke Maro, ngan kanningadi le tiyepe ke pono. Ngan so ru tina ngan ben di bangabangana ke Maro, inbe di ngan tinanpootoo Maro nunngana le tipapos ben ya la iyepe ye di Isrel i. Inbe tisulmai balidi le la iduku koror tani in koonoo ye ni yo tool kuto mai ke Maro itirtir rara ke asara yo be Maro igiri noonoo ke di tooltool ye i. Bong nookoot nga ke be tawetewete mata ye betanga ke so tina, ngan tiap.

6 Ngan ye kene yo tipatar so tina le imot a iken dook ye nene, motong la di tooltool ke paroranga so timadit ye urata kidi nga. Le kanakana ngan tilo ye badabada lono yo ke dama, in a lo tiyei urata kidi yo be tiyei a tilon di tooltool ke Maro ye nga. 7 Bong tool kuto mai ke paroranga so pang Maro, in ya taleu la be ilo ye badabada lono san yo tiweta ye Ni Mison Ki Taunu i. Ngan ilo ye ni tani in ye ke kanakana ngan tiap, bong ilo ye ke ataleu ye rai tina yo atu atu ngan leu. Inbe ye kene tani in ke be ipa baene koonoo a ilo tiap, bong ole ikap rara ke asara yo be iyei paroranga pang Maro ye ya taunu noonoo ki, inbe ye noonoo ke di tooltool yo lodi galanga tiap a tiyei, ngan lapau. 8 Le dada yo iyei a be ilo ye Ni Mison Ki Taunu i, in Maro Amunu Silene ipapos paidi nen: Kene yo badabada ke sungunu tani in ikododo go ye in nga, ngan dada yo be di tooltool tipa le tila potai pang ye Maro i, in o koon panganga pang di tiao. 9 Nen le badabada tani in ben inanpootoo betanga medana gurunu yo muku ngan Maro ipamede pang di tooltool ki i. Ngan nen le idi tooltool yo nookoot tayepe nga, ngan ke be takamata inbe lod galanga nen, so tina yo tikap pang Maro ye lo ponana kidi nga, inbe so kidi ke paroranga yo di tooltool ke paroranga tiyei paroranga ye nga, ngan ke be ikarata di a be nen ngan lodi galanga ben di ngan tiyei touo busunu siap, ngan tiap. 10 Ngan ger tina yo titoo nga, ngan iwete ye so ke kaningi le yinungu, inbe ye dada matana matana ke rriungu yo be iyei di a tinidi igalanga nga. Bong so yo nga, ngan so ke diki leu. Inbe Maro ikap pang di tooltool tina a be nen ngan titoo le ilo ye lal yo be dada paunu tani in pombe ye i.

11 Bong nookoot nga dada paunu tani in iken mallangana, yesoo Kirisi yo tool kuto mai moolmool ke paroranga so i, in si pombe oo. Inbe ya in la dada yo be takap so dook mata ke Maro yo ipamede betanga medana ye koot be ikap paidi nga. Ngan iyei nen, yesoo ya in la idewe badabada yo iken ye malala Maro in a ilo lono, inbe ipa so le lo pombe pang ye Maro ya taunu i. Ngan badabada tani yo iken ye malala ke Maro i, in dook mata ki taunu, yesoo di tooltool tire ye baedi tiap, inbe dawa ben so kapala yo ke tana pono nga, ngan tiap lapau. 12 Inbe ye kene yo idewe a ilo ye Ni Mison Ki Taunu yo Maro iyepe ye in nga, ngan ikap rara ke di meme le bulumakau, yo tirau di, ngan a ilo tiap. Bong ikap rara ki ya taunu, inbe idewe a ilo ye ni yo Maro iyepe ye i, a lo ikap panga, a be nen ngan Maro igiri noonoo kiidi, inbe ipamulidi ye so dook tiap yo be igarungidi i. Ngan urata tani yo Kirisi iyeii nen i, in iyeii pattu leu a imot oo. Le ole iyeii mulu tiap. 13 Ngan dada yo gurunu in nen. Kumata be di tooltool tinidi giri leu ye Maro matana nga, ngan di tooltool ke paroranga so ole tikap rara ke meme le bulumakau tamoto yo tiraumata di nga, inbe tikap kawa ke bulumakau pakara yo tidauni in a titirtir lo ye di tooltool tina ngan podi, ngan ole iyei di le tinidi igalanga mulu ye Maro matana, inbe itara tarkilanga ye di ben di tooltool yo ipootoo di panga ya taunu nga. 14 Ngan kumata be rara ke di asara ngan ke be iyei urata yo nen nga, ngan ole yelei ye rara ke Yesu? Ngan rara ki in gurana ki mai san le ole ingas tiniidi yo ke diki ngan leu tiap, bong ole ingas lodo le igalanga lapau. Yesoo, Maro Amunu Silene yo iyepe nen le taukan motingi i, in ya la ipamede Kirisi a ya taunu iyei paroranga ye a imata yidi i. Inbe paroranga tani yo iyeii pang Maro in dook mata le imot, yesoo ya in iyepe le taukan busunu ye Maro matana. Le ye rara ki tani nga, ngan ingas lodo le igalanga moolmool, a be nen ngan lodo tina ngan ke be iyolidi be la tatoo dada dook tiap sa yo be tammata a tallede ye, ngan mulu tiap, bong idi nga ke be tayei urata ke Maro yo iyepe nen le taukan motingi i.

15 Ngan ye punu yo nen i, in la le Kirisi iyepe kataunu kidi tooltool inbe Maro a ikarata dada paunu tani yo be la tiye Maro tigaua mulu ye i. Yesoo, Kirisi iraia tinini mai i le imot a tiraumate be iyimi di, inbe ipamulu di ye urata moonoo masngana kidi kootoonoo yo betanga medana gurunu in iwete be ole tikap ye noonoo kidi nga. Ngan ya in iyei nen a be nen ngan di tooltool yo Maro ikiu di panga ya taunu nga, ngan ole tikap so dook mata yo ipamede betanga ye nga. Ngan so ki tina yo be ikap pang di nga, ngan ole iken nen le taukan motingi.

16-17 Le kakamata, ye kene yo tool atu ipamede betanga be so ki ngan ole natunu ikap kumata le be imata nga, ngan ole betanga medana tani in iken nen le lo tool tani in imata, ngan la be ole itar kanono nga. Bong kumata le be tool tani yo ipamede betanga i, in imata tiap, bong iyepe matana rrene go nga, ngan ole betanga medana tani in iken sokorai le taukan kanono, inbe natunu o ke be ikap so ki tina ngan tiap. 18 Ngan nen le ye kulkulunu yege ye kene yo Maro ipamede betanga pang di tooltool ye dada yo be tagaua le atu ye in nga, ngan tiraumata di asara a rara kidi imati. 19 Le ye kene yo Mose iwetewete pang di tooltool le imot ye noonoongoo ke ger ke Maro tina, motong la ikap rara ke di bulumakau natunu le meme a ipargarungrai ye ran nga. Inbe ikaua kai isop baene a ipiu ye sipsip bulbulini yo kooroonoo nga, motong la isilia idu ye rara tani, inbe itirtiri lo ye rau lulungu yo ger ke Maro iken ye in le ipa ye di tooltool, 20 inbe iwete pang di nen, “Ngan rara nga ke betanga medana yo Maro iwete le koon mede pang ye be katoo i, in naii.”✡ Pamulenge 24:8 21 Inbe gaongo leu, Mose ikap rara a itirtir lo ye badabada ke sungunu, inbe itirtir lo ye so ke sungunu le imot yo iken badabada lono ngan pono. 22 Le iyei nen, yesoo betanga yo iken ye ger ngan iwete nen, be so tina ngan le imot ole titirtir rara lo pono, ngan la be ole iken galangana ye Maro matana nga. Bong kumata be tiraumata so sa le rara ki imati tiap nga, ngan matin nga le Maro ke be igiri noonoo kidi tooltool tiap.

23 Le badabada ke sungunu yo tire tana pono i, in ipa ye so le imot yo iken lono nga, ngan inanpootoo so moolmool yo iken ye malala ke Maro nga. Ngan la le tikap rara ke di asara, inbe tiyei paroranga ye, a be nen ngan iyei so tina le igalanga dook mata ye Maro matana. Bong so moolmool yo iken ye malala ke Maro nga, ngan paroranga yo nen nga, ngan ke be iyei le igalanga ye Maro matana tiap. Le paroranga yo dook mata moolmool le illoso paroranga yo tiyeii ye rara ke di asara i, in leu la ke be iyei di le igalanga ye matana i. 24 Le kakamata, ye kene yo Kirisi imata motong imadit mulu ye in nga, ngan le idewe badabada ke sungunu yo di tooltool tire ye baedi a ikodo tana pono in tiap, yesoo in ben inanpootoo ni moolmool yo Maro iyepe ye i. Bong ya in ilo malala ke Maro, le nookoot nga ikaua damodo a ikodo dama ke Maro, inbe ipatarau pang Maro be ilonidi. 25 Ngan tool kuto mai ke paroranga so pang Maro in ole ilo ye Ni Mison Ki Taunu pattu ye rai tina yo atu atu nga be iyei paroranga nga. Inbe ya in ikap rara ki ya taunu be iyei paroranga ye, ngan tiap. Bong Kirisi, in ilo malala ke Maro a be lo iyei paroranga ye rai tina yo atu atu, ngan tiap, bong iyeii pattu leu ye rara ki ya taunu. 26 Ngan nen le kumata be iyei urata ben tool kuto mai ke paroranga so pang Maro iyei nga, ngan kulkulunu yege ye kene yo Maro itar lang le tana ye in le ise nookoot katai nga, ngan matin isolo masngana a rara ki imati ye lal alunu san. Bong tiap! Ya in, ye lal yo Maro itaru be tana i imot ye i, in isi pattu leu be si iyei paroranga ye rara ki ya taunu, a be nen ngan igiri noonoo yo kiidi nga. Le urata ki tani in iyeii a imot oo. 27 Ngan idi tooltool le imot nga, ngan ole tammata pattu leu, lo ngan pang dama ni ngan Maro ole ikarata betanga kiidi. 28 Le gaongo leu, Kirisi imata pattu leu a iyei paroranga ye rara ki be igiri noonoo kidi tooltool nga le imot. Inbe ya in ole imulu a isi paru ki nga, ngan be si igiri noonoo tiap, bong be si ikap di tooltool yo tinamu ngan a ipamulu di ye so dook tiap yo be igarung di i.