1 Ang ngan Maro di natunu yo lono pang mai san nga, le katoo dada gaongo leu ben yo itoo nga. 2 Inbe kayepe ye yepongo dook mata yo be lomim pang di diemim ye mai san i, le dawa ben Kirisi yo lono paidi mai san nga. Ngan ya in iraia tinini a imata yidi, le iyei ben so ke paroranga pang Maro. Ngan ye soo so yo iyeii i, in iyeie Maro le lon ponana ye, dawa ben tool iyei paroranga ye so a kini ki dook mata ilo pang ye Maro le lon ponana ye nga.

3 Nen le kumata be ang ngan kayei ben di tooltool ke Maro koot nga, ngan kin kakapsap ye dada ke kerenge yo be moomoodoo ye nga, ngan be. Inbe kin kayei dada kapala yo giri leu ye Maro matana nga, inbe matamim gorengana ye so ke di diemim ngan be, yesoo di tooltool yo Maro ipootoo di panga ya taunu nga, ngan o ke be tiyei dada yo nen, ngan tiap. 4 Ngan nen le kin kawete betanga yo be kagarung di tooltool lodi ye nga, ngan be. Inbe kawete betanga yo taukan punu nga, inbe kayei sere ye betanga yo be di tooltool tilongo ngan moomoodi ye, ngan be. Bong kawete lo ponana kiang pang Maro ye soo so yo ilonang ye nga. 5 Au i ole ayeie betanga kiau i le igalanga, a nen ngan lomim galanga nen: Tool yo ikapsap ye dada ke di kerenge, too iyei dada yo giri leu, too matana gorengana ye so kidi diene i, in o ke be lo igaua ye di tooltool yo Kirisi iye Maro be matadi kala di, ngan tiap. Yesoo, tool yo nen i, in dawa ben isung pang di kai padodo, le ke be ikaua so yo Maro ipamede betanga ye be ikap pang di tooltool ki, ngan siap. 6 Ngan nen le kin kalongo pang tool sa yo be ikaua lungunu yang a be la kayei dada dook tiap yo nen nga, ngan be. Yesoo, betanga kidi ngan taukan punu, inbe di tooltool yo tisak noonoongoo a tiyei nen nga, ngan kate malmal ke Maro ole pombe ye di. 7 Ngan nen le kin kayangara di tooltool yo nen, ngan be.

8 Muku nga ang ngan ben kayepe todo lono ye dada dook tiap kiang yo kayei nga, bong nookoot nga ben kayepe ye ni galangana, yesoo kaye Tool Mai kagaua le atu a iyei ang le lomim iken galangana dook mata. Ngan nen le ole katoo dada yo Maro lono dook mata ye nga. 9 Ngan awete nen, yesoo di tooltool yo tiyepe ye ni galangana nga, ngan kanakana ngan ole tiyei dada yo dook mata ngan le imot, inbe tiwete betanga yo moolmool nga, inbe titoo dada noonoonoo yo ke Maro nga. 10 Le tina kakapye be le kapuske soo dada yo be Tool Mai lono dook mata ye nga, inbe kayei. 11 Inbe kin kayangara di tooltool yo ben tiyepe todo lono ngan a katoo di ye dada dook tiap kidi yo tiyei, ngan be. Bong be nen ngan kapapos urata dook tiap kidi yo tiyei ngan le iken mallangana, a be nen ngan timot ye. 12 Yesoo, di tooltool tina ngan tiwala muridi pang Maro, inbe urata yo tiko a tiyei sollono nga, ngan atoo, idi nga moomoodoo be tawetewete ye. 13 Bong ye kene yo be tapapos dada tina le imot yo nen ngan be ila mallangana nga, ngan ole di tooltool lodi galanga ye ben ngan dada belei nga. 14 Yesoo, so le imot yo ise le iken ni galangana nga, ngan todo ke be iduku mulu tiap, bong ole se iken mallangana. Le ye punu in la le di tooltool tiwete nen:

15 Ngan nen le kakap tutang dook leu ye dada kiang yo kayei nga, le kin kapa ben di tooltool yo taukadi lo galanga ye dada dook mata yo be titoo nga, ngan be. Bong be nen ngan kapa ben di tooltool yo lodi galanga ye dada yo dook mata nga. 16 Ngan lal yo nookoot tayepe ye nga, ngan dook tiap. Nen le kanakana ngan be dada atu koon panganga pang be kayei dada yo dook mata nga, ngan kayei leu, ole nen ngan lal yo be kayeii ye i, in ila ilene sokorai. 17 Ngan nen le kin kayei ben di tooltool kapakapa be, bong kakapye be le lomim galanga dook ye soo so yo Tool Mai lono be kayei nga. 18 Inbe kin kayin ran medana mata le kutomim moo ye be, ole nen ngan iyei ang le kayei dada dook tiap ben kidi gaunu yo tiyei nga. Bong be nen ngan katar manga pang Maro Amunu Silene a ipaponang, a ben nen ngan ipasongosongang ye dada dook mata yo ki nga. 19 Ngan ole kawete pang di diemim kapala ye woungu yo iken ye Rau ke Woungu nga, inbe woungu yo be kayitmaka Yesu ene ye nga, inbe woungu kapala yo Maro Amunu Silene inin pang a iken lomim nga. Le katara lomim le imot ye, inbe kawou pang Tool Mai. 20 Le kanakana ngan kawete lo ponana kiang pang Tamada Maro ye so ngan le imot ye Tool Mai kiidi Yesu Kirisi ene.

21 Kumata le ang ngan be kaporonaia Kirisi nga, ngan ang atu atu karautoo ang le du kayepe di diemim parmadi, inbe kaporonai di lapau. 22 Le ang di garup yo kerenge nga, ngan karaua pang di nimimtooroo a katoo betanga kidi dawa ben yo karaua pang Tool Mai, inbe katoo betanga ki nga. 23 Yesoo, di nimimtooroo ngan la tiyei kuto mai pang, dawa ben Kirisi yo iyei kuto mai pang idi tooltool yo tagaua ye bareme ki nga. Ngan nen le Kirisi tani in dawa ben kutodo, inbe idi nga dawa ben baene le kene inbe soonoo kapala yo ke tinini nga. Inbe ya in tool tani yo ikau idi a ipamulidi ye so dook tiap yo be igarungidi i. 24 Nen le di garup yo kerenge nga, ngan ole karaua pang di nimimtooroo ye so nga le imot lapau, dawa ben di tooltool yo tigaua ye bareme ke Yesu ngan tiraua pang Kirisi nga.

25 Ang tamoto yo kerenge nga, ngan ole lomim pang di rimamim mai san, dawa ben Kirisi yo lono pang di tooltool yo tigaua ye bareme ki ngan mai san nga. Moolmool, ya in lono pang di mai san, ngan la le ya taunu iraia tinini pang di a be ilon di ye. 26 Ngan iyei nen, a be nen ngan tiyei ben di tooltool ke Maro, inbe titoo dada le imot yo lono be titoo nga. Nen le iyei di le tinidi igalanga ye matana ye kene yo tilongo betanga ki a titara lodi medana ye ngan le tirriu di nga. 27 Inbe ya in iyei nen, a be nen ngan iyei idi tooltool yo tagaua ye bareme ki nga, le tayei dawa ben garup yo ikarata tinini le dook mata ki taunu pang kerenge i. Ngan nen le Kirisi lono be giri sa isau yidi tiap, inbe so dook tiap sa yo ingaua tiniidi ngan tiap lapau, bong be tiniidi igalanga dook mata le imot, inbe tayepe le taukada busunu ye matana, yesoo ya in lono be idi nga tayei ben di tooltool ki ya taunu, dawa ben tamoto ikaua garup a iyei ya taunu rimana i. 28 Le ye dada gaongo leu ben yo Kirisi lono mai san pang di tooltool ki yo tigaua ye bareme ki nga, ngan ang di tamoto yo kerenge nga, lomim pang di rimamim mai san, ben yo lomim pang ang tapmim a le matamim kala tinimim dook mata nga. Ngan tamoto yo lono pang rimana mai san i, in dawa ben ya taunu lono panga mai san lapau. 29 Le kakamata, tool sa yo lono dook tiap pang ya taunu a be igarungu tinini, ngan tiap, bong ipakani inbe matan kala dook mata. Le in dawa ben Kirisi yo matan kala di tooltool yo tigaua ye bareme ki nga, 30 yesoo idi nga ben baene le kene inbe soonoo kapala le imot yo ke tinini nga. 31 Ngan nen le betanga yo tiwodo a iken ye Rau ke Maro ngan iwete nen, “Ye punu yo nen in la le tamoto be ikere nga, ngan ole iyege tamana le tinana, inbe la iye rimana tiyepe gaongo, a be nen ngan yaru tigaua le tinidi ataleu.”✡ Pudu 2:24 32 Ngan betanga nga imoo, inbe punu iken mallangana tiap, bong akamata nen; betanga nga iwetewete ye dada yo Kirisi iye di tooltool ki ngan tigaua le atu ye i. 33 Bong betanga yo nga iman pang yidi lapau. Le ang atu atu ngan lomim pang di rimamim mai san, ben yo ang tapmim lomim pang mai san nga. Inbe ang garup ngan lapau, katoo dada yo dook mata ngan ye di nimimtooroo matadi.