1 Ang di diemam nga, nga be amwete pang ye mulenge ke Tool Mai kiidi Yesu Kirisi, inbe ye gaongo kiidi yo be lo taye tagaua ye i. Nen le amwete pang nen, 2 kin katakrai palbe leu a lomim kap gogo dada ye betanga ke di tooltool kapala yo tiwete be lal ke Tool Mai yo be imulu a isi ye i, in pombe koot, ngan be. Di tooltool tina ole tillung be betanga tani in ipa ye betanga yo amkaua Maro koonoo be amwete nga, too ipa ye betanga yo amwete pang di tooltool kapala nga, too ipa ye rau yo amwodo nga. 3 Bong kin kalongo pang tool sa yo be illungang ye betanga nen, ngan be. Yesoo, lal tani in ole pombe sokorai tiap, bong muku ngan ole di tooltool alunu la be tiwala muridi pang Maro nga, inbe tool ke sak noonoongoo ole pombe mallangana. Ya in tool tani yo be ilo pang ye malala ke masngana i. 4 Ngan tool tani ole iyei ben koi pang so le imot yo di tooltool tisung pang di a tiwete di ye maro kidi nga. Inbe ya taunu ole iyitmaka ene le ilo ete ye so ke Maro nga le imot, a be nen ngan ya taunu itaru le lo iwur bareme mai ke sungunu lono, inbe iwete be ya taunu in la Maro i.

5 Lomim kalli, too? Ye kene yo ayang tayepe ye in nga, ngan awete pang ye so tina ngan oo. 6 Nen le ang ngan lomim galanga ye tool yo nookoot nga ilele tool tani a le se pombe mallangana tiap i. Bong ole ise pombe mallangana ye lal yo Maro itaru panga be ise pombe ye i. 7 Bong ngan nookoot nga dada ke sak noonoongoo in ipa sollono go. Ngan ole ipa sollono nen le ilo ye lal yo be Maro inganga tool tani yo ilele i, in le ikoo, 8 ngan la be tool ke sak noonoongoo tani in ole se pombe mallangana nga. Ya in tool tani yo be Tool Mai Yesu isi ngan ole iwete leu a amunu yo ipas ye koonoo a isi in iraumate le imata, inbe igarungu ye gurana mai ke nunngana i. 9 Ye kene yo be tool ke sak noonoongoo ise pombe mallangana ye in nga, ngan ole ipa ye gurana ke tool dook tiap Satan, a be nen ngan iyei gogo mos matana matana le urata medana maimai yo iyei tarkilanga panga a be di tooltool tikamata ngan koodi panganga ye nga. Ngan nen le ole tiyeisa Maro la o ikaua gurana panga be iyei so ye i. 10 Inbe tool tani in ole iyei dada dook tiap matana matana a ikap lungunu ye di tooltool yo titoo dada yo be Maro igarung di ye nga. Di ngan ole Maro igarung di nen, yesoo lodi mai san pang betanga moolmool tiap, le ke be ikap di a ipamulu di ye dada dook tiap yo be igarung di i, in tiap. 11 Ngan ye punu i, in la le Maro iyei lodi a be nen ngan titara lodi medana ye betanga yo ke kaplungunu nga. 12 Ole iyei di tooltool tina nen, a be nen ngan ikarata betanga kidi tooltool le imot yo titara lodi medana pang betanga moolmool tiap, inbe lodi ponana ye dada dook tiap yo tiyei nga.

13 Bong di diemam nga, Tool Mai lono pang mai san le kanakana ngan amwete lo ponana kiam pang Maro yang. Ngan dook mata le amyei nen, yesoo kulkulunu yege ye kene yo Maro itar lang le tana tiao nga, ngan ipootang panga a be nen ngan ipamulang ye so dook tiap yo be igarungang i. Ngan ipamulang ye urata yo Amunu iyeii yang a be kayepe dawa ben di tooltool yo ipootoo di panga ya taunu nga, inbe ye lomim medana yo kataru ye betanga moolmool ki i. 14 Maro ikiu ang panga ye bingi dook mata tani yo amwetewete pang ye i. Ngan ye yo a le iyei nen nga, ngan be nen a ye kene yo di tooltool tikamata Tool Mai kiidi Yesu Kirisi be ene mai san ke be tipayiti nga, ngan ole di lapau tipayit emim le ipa ye ene. 15 Ngan nanga ang di diemam nga, kakodo le kamede. Inbe kaparama patomonaingi tina yo amwete pang ye koomam too amwodo ilo ye rau a amyawar pang nga.

16-17 Nen le ampatarau pang Tamada Maro yo lono paidi mai san i. Ya in iyei dada dook mata paidi, a nen ngan ipamede lodo le ikenen leu inbe tatara lodo le atu ye so dook mata yo be pombe i. Le ampatarau panga iye Tool Mai kiidi Yesu Kirisi be tipamede lomim, inbe tipamedang ye dada dook mata yo katoo nga inbe ye betanga dook mata yo kawete nga.