1 Di diek yo lok pang mai san nga, ngan i rau kiau ru ki yo awode pang in naii. Ngan rau ru tina yo awodo nga, ngan be apamadit lomim ye a be nen ngan ole lomim kaua urata dook ye dada moolmool yo ke Maro nga. 2 Au i lok be lomim tut mulu ye betanga yo muku ngan di Maro koonoo tiwete nga. Di ngan Maro ipootoo di panga ya taunu, inbe tikaua koonoo a tiwete betanga ki paidi. Inbe au i lok be lomim tut ye betanga ke Tool Mai kiidi Yesu Kirisi. Ya in tool tani yo ikau idi a ipamulidi ye so dook tiap yo be igarungidi i. Inbe betanga ki tina, ngan di aposol ki tiwete pang a kalongo oo.

3 Ngan so maiyoko yo be lomim galanga ye in nen: Nookoot nga le ilo ye lal yo be Yesu imulu a isi ye in nga, ngan di tooltool ke palenge sere ole pompombe a tingelerai so ke Kirisi. Inbe ole titoo di tapdi lodi a tiyei dada dook tiap yo be lodi ponana ye nga. 4 Ole tiwete nen, “Ai, Kirisi ipamede betanga be imulu a isi nga, ngan le isi lapau? Ngan mukot yege ye kene yo di tiudu timmata ye in le se nookoot katai nga, ngan so tina nga le imot ngan iken gaongo leu ben tina ye kene yo tana i pombe ye i.” 5-6 Tiwete nen, bong kakamata, mukot yege ngan Maro iwete leu, inbe lang pombe. Inbe iyeie ran le idu pang lopo, inbe tana ise pombe ye ran a iken mallangana. Motong la ye kene san mulu ngan Maro iwete leu, inbe ki mai imol a isi le oongoo ki iduku tana mai i le imot a igarungu. Ngan di tooltool tina ngan lodi galanga ye so tina oo, bong lodi pang betanga yo nen ngan tiap. 7 Inbe ye dada gaongo leu, Maro iwete be lang le tana yo nookoot katai iken nga, ngan be iken nen a inam ye ei yo be pombe a be nen ngan idaun di ye i. Le inam le ilo ye lal yo be ikarata betanga kidi tooltool ye i, ngan la be iyemenai di tooltool yo tiwala muridi pang dada dook mata yo lono be titoo nga. Le ye kene tani in ole igarung lang le tana le ipa ye di tooltool tina yo dook tiap ngan lapau.

8 Le di diek yo lok pang mai san nga, ngan be awete betanga atu pang a lomim kalli be. Tool Mai ikamata ke atu in dawa ben rai tau atu, inbe rai tau atu in ikamata ben ke atu. Le ye kamatanga ki ngan yaru nga gaongo leu. 9 Ngan di tooltool kapala lodi tar nen be Tool Mai in itu le ke be iyeie betanga ki yo ipamede i, in le itara kanono tiap, bong tiap. Ngan ye punu yo a le katen malmal tarai pang ye tiap in nen. Ya lono be igarungu tool sa ye noonoo ki yo iyei ngan tiap, bong lono be di tooltool nga le imot tiportak lodi ye dada dook tiap kidi yo tiyei nga.

10 Bong lal yo Tool Mai be imulu a isi ye i, in ole pombe dawa ben tool ke pinnau yo iyei urata ki sollono i, le ke be lomim galanga ye lal yo be pombe ye in tiap. Ngan ye lal tani in lang katene ole putumbe a ilene, inbe mununu ki mai ole ila ni mooloo san. Inbe so le imot yo iken lang katene nga, ngan ei ole ikan di le imot. Inbe ye lal tani in tana le so le imot yo iken ye nga, ngan ei ole ikan di le tilledi lapau.* Dada san yo be taportaka betanga i ye i, in nen: Ngan ye lal tani in tana le so le imot yo iken ye nga, ngan Maro ole ipapos urata dook tiap kidi yo tiyei nga, a be nen ngan iyemenai di ye.

11 Ngan nanga, kumata be so tina ngan le imot be tilledi ye dada yo nen in nga, ngan ang ngan lomim tar be ole katoo soo dada? Ngan dook mata nen, be ole kayepe dook mata le dawa ben di tooltool ke Maro yo ipootoo di panga nga, inbe katoo dada dook mata le imot yo Maro lono be katoo nga. 12 Le nookoot ye kene yo kayepe a kanam ye lal yo Maro itaru be Kirisi imulu a isi ye in nga, ngan kakapye be kayei urata ke Maro a nen ngan lal tani in ole pombe palbe leu. Ngan ye lal tani in ole ei ikana lang a igarungu, inbe so le imot yo iken lang katene nga, ngan ole ei iyesnai di le tiyei ran koonoo. 13 Bong idi nga lod tutu betanga yo Maro ipamede i. Ngan ya in iwete nen, be pang dama ni nga, ngan ole ikarata lang paunu inbe tana paunu ngan pang di tooltool yo noonoodi nga leu be tiyepe ye. Ngan la idi nga tatar matada ye so tina yo be pombe nga.

14 Nen le ang di tooltool kiau yo lok pang mai san nga, ye kene yo katar matamim a kanam ye so tina yo be pombe nga, ngan kakapye be kayepe le tinimim iken galangana dook mata, inbe kayepe le taukamim busunu ye Maro matana. Inbe kayepe le lo botoboto sa be iken kataunu kiang kaye ngan be, bong kaye kayepe ye lo silene dook mata. 15 Le matamim too dook ngan. Ye punu yo Tool Mai katen malmal tarai pang di tooltool ye tiap in nen, be inam di be tiportak lodi a be nen ngan ikap di a ipamulu di ye so dook tiap yo be igarung di i. Ngan tool kiidi Paulu, yo lodo panga mai san i, in iwete betanga nen lapau. Ya in Maro ikap lo galanga dook mata panga a iwodo rau pang a iwete betanga gaongo leu ben tina yo nookoot ngan awete pang ye nga. 16 Ngan ye rau ki tina le imot yo iwodo nga, ngan iwetewete ye so tina nga. Moolmool, so kapala yo iwodo ilo ye rau ki nga, ngan imoo le ke be lod galanga ye mata tiap. Ngan nanga, di tooltool yo lodi galanga tiap, inbe tikodo le timede ye Kirisi tiao nga, ngan tipagalanga betanga dook ye dadana tiap dawa ben tiyei ye betanga kapala yo iken ye Rau ke Maro nga. Le dada kidi yo tiyeii nen i, in di tapdi ole tiyolo pang di be Maro igarung di ye.

17 Ang di tooltool kiau yo lok pang mai san nga, nookoot nga ang ngan lomim galanga ye so tina ngan oo. Le kin kakawai yang dook leu ye di tooltool ke sak noonoongoo. Ole nen ngan tikaua lungunu yang, ngan ole kakodo le kamede ye lomim medana yo kataru in tiap. 18 Bong kakapye be katoo dada dook mata yo Tool Mai kiidi Yesu Kirisi be lon ponana ye nga, a be nen ngan iyei dada dook mata pang mai le mai san, inbe ilonang le lomim galanga ye le ikenen leu. Ya in tool ene mai san le tayitmak ene nookoot nga, inbe tayitmaka ene a ikenen nen a tala. Moolmool.