1 Au i lok be ang ngan kamalum pau be ayei kapa kasin a ayitmaka ek mulu ngan. Le kin katemim malmal pau palbe be. 2 Maro lono yo pang in mai san, le lono be kayege inbe kala ye tool san tiap. Le ye dada gaongo leu au i matak yoonoonoo yang, yesoo apamede betanga yang be ole akau ang pang tool ataleu. Ngan tool tani in la Kirisi i. Le kayepe le tinimim igalanga dook mata ye matana, a be nen ngan akau ang panga, dawa ben garup paunu yo ikap tutu dook le lo lal ki ke kerenge a tamana ikauu pang ye tamoto yo be iyooloo in nga. 3 Bong au i atattadai be ole nen ngan di tooltool ke kaplungunu tillungang le kayege dada moolmool kiang yo kagaua lomim le imot pang Kirisi ye i. Le lomim tut, dada yo nen in pombe pang ye Ewa. Ngan ye kene tani in moto yo lon galanga san ye kaplungunu i, in ikaua lungunu ye a iwala murini pang Maro.

4 Au i atattadai yang nen, yesoo kumata le sei tool be iman pang yang be man iwetewete betanga san pang nga, ngan kapas le katar talngamim panga leu. Le kumata be iwetewete betanga san pang ye Yesu yo dawa ben am nga amwetewete pang ye in tiap i, too iwete be ole kakaua maro amunu san ye yo kakauu muku i, too iwete bingi dook mata san pang ye yo kakauu koot in nga, ngan nga yelei a kapas le katar talngamim panga leu nga. 5 Bong di tooltool tina yo tikiu di ye di aposol, inbe ang ngan kakamata di ben edi maimai nga, ngan o ke be tillosau a ayepe parmadi, ngan tiap. 6 Le moolmool, kumata be au i lok galanga ye dada dook mata ke betebetanga tiap, bong au i nga lok galanga ye so yo awetewete ye nga. Le kanakana ngan dada tina le imot yo amyei nga, ngan amyei be nen a ampatnaia lo galanga tani pang.

7 Ye kene yo awetewete bingi dook mata pang ye in nga, ngan atarau au tauk le adu lopo yege ni, inbe akap touo balingi sa ye urata kootoonoo kiau tiap. Bong au i ayei nen a be nen ngan ayitmakang le lo kakodo. Le yelei, ye dada kiau yo ayeii nen i, in o akapsap ye noonoo, too? 8 Ngan ye kene tani nga, ngan au i akap loningi ye di diede kapala yo tigaua ye bareme ke Yesu a be ayei urata kiau ye kataunu yang nga. Ngan nen le dawa ben au i apinoo so kidi a be nen ngan alonang ye. 9 Inbe ye kene yo ayang tayepe gaongo a amaka ye so nga, ngan le apaloko moonoo tani in lo pomim tiap. Bong di diede kapala yo tiyepe Masedonia ngan tikap so le imot yo amaka ye ngan man tikap pau. Le ye kene tani in apaloko moonoo sa lo pomim tiap, inbe nookoot nga inbe pang dama ni a tala, ngan o ke be apaloko moonoo sa lo pomim tiap lapau. 10 Le dawa ben Kirisi iwete betanga moolmool, a betanga tina ngan iken yau nga, le au i awete betanga moolmool pang nen lapau! Le tooltool sa yo ke tana mai Akaia ngan ke be ilelau ye yo ayitmakau ye dada tani yo ayeii kataunu yang, in tiap. 11 Ngan nga yelei, au i o lok pang mai san tiap la le atoo dada kiau tani i, too? Tiap yege, Maro in lon galanga nen, au i lok pang mai san moolmool! 12 Le dada tani yo nookoot nga atoo le atara moonoo sa lo pomim be kakap kaningi le so pau ye tiap i, in ole atoo le ikenen leu, a be nen ngan akodokala di sema tooltool yo koodi payit di, inbe tiwete be di ngan titoo dada gaongo leu ben yo amtoo nga. 13 Di tooltool yo ngan tiwete be di ngan aposol, bong tiap. Inbe tikaua lungunu be di ngan tiyei urata ke Kirisi a tillungu di tooltool, inbe tikapye be tikap am aposol yo moolmool ngan nemam. 14 Bong idi nga ke be tatakrai ye dada yo kidi nga tiap, yesoo Satan ya taunu la ikaua lungunu ye di tooltool a tikapsap le tiyeisa o ya in bangabangana ke Maro yo ipa ye nunngana a isi i. 15 Nen le kumata di kapraingi ki ngan di lapau tikaua lungunu yang be di ngan di kapraingi ke Maro yo titoo dada noonoonoo ki nga, ngan kin katakrai ye dada kidi yo tiyei, ngan be. Di tooltool yo nen nga, ngan pang dama ni ngan ole Maro iyemenai di le tisolo masngana maiyoko le lo itarke dada kidi yo nen nga.

16 Nga be awete pang mulu nen; kin ang ngan sa lon tarau be au i tool kapakapa, ngan be. Bong kumata le lomim tarau ben moolmool au i tool kapakapa nga, ngan dookoot, kayegau sila ayepe nen a kook payitau kasin mulu ngan. 17 Le dada yo au tauk kook payitau ye nen i, in atoo dada yo Tool Mai be iwetewete ye, ngan tiap, bong atoo dada kidi kapakapa leu. 18 Ngan di tooltool alunu yo kaye di kayepe, ngan titoo dada ke tana i a di tapdi koodi payit di. Ngan nen le au lapau, ole kook payitau ye dada kiau dawa ben yo di tiyei nga. 19 Ngan nen le dook mata, yesoo ang ngan lomim tar be ang ngan lo galanga kiang dook mata, ngan nen le lomim ponana be kalongo betanga kidi tooltool yo kapakapa nga. 20 Ngan yo ngan leu tiap, bong kumata sei tool be iyei ang a kayei ben poranga ki, too ikaua lungunu yang a be ipinoo so kiang, too idada pomim, too ya taunu iyitmaka ene le ilo ete ye di tooltool kapala, too be ipodo pangamim nga, ngan kamalum panga a iyei soo so yo lono be iyei nga. 21 Bong am nga amyei dada yo ben di tiyei pang, ngan tiap. Le nga yelei, nga ole moomoomam ye yo taukamam guramam ben di le ke be amyei dada yo dook tiap nen, ngan pang tiap, too?

Ngan au i nga awetewete dawa ben di kapakapa nga. Nen le kumata sei tool be moomoonoo tiap, inbe koon payiti ye dada ki yo iyei nga, ngan au i ole moomook tiap, inbe kook payitau nen lapau. 22 Nga yelei, di tooltool tina ngan tiwete be di ngan di Ibru* Di tooltool yo tiwete Ibru koodi inbe titoo dada le momo kidi Yuda nga, ngan tikiu di ye di Ibru., too? Ngan dook mata, au i tool kidi Ibru lapau. Inbe tiwete be di ngan ke Isrel, too? Ngan dook mata, au i ke Isrel lapau. Inbe tiwete be di ngan sasa ke Apram, too? Ngan dook mata, au i sasa ke Apram lapau. 23 Inbe tiwete be di ngan tiyei urata pang Kirisi ben kapraingi ki, too? Atoo, au i nga o ayei kapakapa ye betanga kiau yo awete nga, bong au i kapraingi ke Kirisi lapau, inbe ayei kaiye urata panga le allos di ye. Le atorang, di ngan tiyei urata pang Kirisi? Ngan au i ayei kaiye urata panga, le allos di. Inbe di koi kidi tikap di a titar di lo rumu dook tiap kidi talnga dikidiki lono? Ngan au i, di koi kiau titarau kaiye a lo aken rumu dook tiap ke di talnga dikidiki lono. Inbe di koi kidi tiwete a tiwalis di ye koro medana? Ngan au i, tiwalisau kaiye ye koro medana a asolo masngana mai, inbe ye lal kapala ngan kasin leu be amata. 24 Inbe di kuto maimai kidi Yuda tiwete a tiwalisau ye koro medana le kinkatingi ki ben sangaul tol inbe balana limi be pai. Ngan tiyei au nen pattu leu tiap, bong tiyei dada nen pau le palimi. 25 Inbe ye lal tol mulu, ngan tool kuto mai kidi Rom iwete a tiwalisau ye koro lapau. Inbe kene atu ngan di tooltool tikapye be tikatmatau ye pat a be amata. Inbe ookoo maimai tol yo akooi ye nga, ngan di le tol timere a tidaudar le kene atu in adau ye bong atu inbe ke atu tiek pono. 26 Inbe kanakana ye panga kiau be apa a ala ye malala kapala nga, ngan asolo moonoo mata le lok tar be ole amata. Ngan au i asolo moonoo ye kene yo asiutu ran ye i, inbe ye di tooltool ke pinnau yo tiko dada a be nen ngan tigarungau nga. Inbe asolo moonoo ye di diek Yuda yo malala kiam atu nga, inbe ye di tooltool yo tipa ye rara kidi Yuda tiap nga, inbe ye di tooltool ke malala maimai yo ayepe ye nga, ngan lapau. Inbe asolo moonoo ye kene yo apa ye ni yo taukan tooltool in nga, inbe ye kene yo akooi ye ookoo me pono nga. Inbe asolo moonoo ye di tooltool yo tillungau be di ngan di diede kapala yo titara lodi medana pang Yesu, bong tikapye be tigarungau lapau nga. 27 Inbe au i arau au dook ye urata mata, le ye bong alunu ngan aken dook ye matak tiap. Inbe ye kene kapala ngan taukak so yo be akani i, le pitolau inbe moorookau. Inbe taukak lonloningi dook yo be asousou ye nga, ngan le ningerau. 28 Ngan yo ngan leu tiap, bong so san yo lok imoo ye mai mata lapau in nen. Ye ke kanakana ngan lok kaua urata be ole matak kala di tooltool yo tigaua ye bareme ke Yesu ngan belei. 29 Le kumata alongo sei tool be ikodo le imede ye lo medana yo ki i, in tiap nga, ngan iyei au le gurana kiau be imot. Inbe kumata ede atu be iyei ede san le ikapsap ye noonoo nga, ngan iyei au le katek malmal lapau.

30 Kumata lok be le kook payitau nga, ngan ole kook payitau ye soo so yo ipaposau ben au tauk i taukak gurak nga. 31 Ngan betanga yo kiau nga, ngan moolmool. Inbe Maro yo Tool Mai Yesu Tamana i, in ikamatau le ya in lon galanga yau nen, au i nga allung tiap. Inbe ya in ene mai le ke be tayitmaka ene nookoot nga inbe pang dama ni a tala le ikenen nen leu. 32 Ngan ye kene yo ayepe Damaskas ye in nga, ngan tool yo tool kuto mai Aretas itaru be matan kala malala mai tani i, in iwanga di tooltool ke patokongo la tikodokala dada ke koongoo ke Damaskas, a nen ngan be tikamatau ngan tiparamau. 33 Bong ngan di diek kapala tilonau a tinonau lo ye so ben karei yo tikoii ye koro i, inbe tipadu au ye dada ke kaungu muru a adu tana le akoo.