1 Ang di tooltool kiau yo lok pang mai san nga, Maro ipamede betanga medana tani in paidi oo. Le tina ole tagiri so dook tiap le imot yo be igarung tiniidi le lodo nga, inbe takaratidi le tiniidi le lodo nga igalanga dook mata ye Maro matana. Inbe tatattadaia Maro a taraua panga, inbe tayepe le taukada busunu ben di tooltool yo ipootoo di panga ya taunu nga.

2 Ole ang ngan katara lomim le mai san pam, yesoo am nga amyei touo dada dook tiap sa pang tool siap. Inbe am nga amgarung touo tool siap, inbe amkap touo lungunu ye tool siap lapau. 3 Ngan betanga yo awete nga, ngan be nen a apammoo ang le lomim dook tiap ye nga tiap. Kakamata, muku ngan awete pang nen, be am nga lomam pang mai san. Nen le kumata be kayepe mauremim nga, ngan dawa ben am nga amyepe mauremam, too kumata le be kamatamata nga, ngan dawa ben ammatamata lapau. 4 Le ang ngan, lok rru yang tiap, bong lok ponana yang mai san. Moolmool, moonoo alunu pombe pang yam, bong Maro ipamedau dook mata san le au i lok ponana le lok ponana kaiye.

5 Ngan ye kene yo amlo pombe Masedonia ye in nga, ngan atoo, taukamam maryoongoo, yesoo urata moonoo alunu la pompombe pang yam nga. Le moolmool, kanakana ngan amye di tooltool kapala amparsu ye betebetanga, inbe so san yo igarungam in nen, am nga amtattadai be urata kiam yo amyei kataunu yang, ngan ole itar kanono tiap. 6 Bong ye kene yo Titi ipa le man pombe pang yam ye in nga, ngan Maro yo ipamede di tooltool yo lodi modoko i, in ipamedam, inbe iyei am le lomam iken dook mata mulu. 7 Inbe yo ngan leu tiap, bong so san mulu yo ipamedam le lomam iken dook ye in nen, ye kene yo Titi iman pombe ye in nga, ngan ikaua bingi pam ye yo kaloni a kapamede le lono iken dook mata lapau nga. Inbe iwete pam ben ang ngan lomim modoko mai san le katang ye dada dook tiap yo kayei nga, inbe ang ngan lomim pau mai san, le lomim be kakamatau pa. Nen le betanga ki, ngan iyei au le lok ponana kaiye.

8 Ngan kumata be lomim modoko ye rau kiau yo muku ngan awode pang in nga, ngan au i lok dook tiap ye tiap. Moolmool, kulkulunu ngan lok modoko ye, yesoo akamata ben ole lomim massingi ye lapau, bong ke be lomim massingi ye le manga mooloo tiap. 9 Le nookoot nga au i lok ponana nga, ngan ye yo rau kiau iyei ang a lomim modoko, ngan tiap. Bong au i lok ponana nga, yesoo ye lo modoko kiang tani i, in iyei ang le kaportak lomim pang ye Maro inbe kayege dada dook tiap yo kiang nga. Inbe lok galanga nen be lo modoko tina yo kiang nga, ngan itoo dada yo Maro lon taru be ole ilonang ye i. Le tina am nga amgarungang kasin pitiap yege. 10 Ngan lo modoko yo pombe ye dada yo Maro lon taru be ilonidi ye i, in be iyei idi a taportak lodo pang ye, a be nen ngan ikau idi a ipamulidi ye so dook tiap yo be igarungidi i. Le lo modoko yo nen ngan ke be lomim dook tiap ye tiap, bong lo modoko yo pombe ye dada kidi tooltool ke tana i nga, ngan so ke be iyei idi a tammata ye. 11 Le kakamata, ye kene yo Maro iyei ang a lomim modoko ye in nga, ngan le soo dada pombe pang yang i? Ye dada tani, in Maro iyei ang le ang ngan katara lomim moolmool be katoo dada yo dook mata nga, inbe palbe leu be kamadit tina le kakarata betanga ye dada yo kiang nga. Inbe ang ngan kakap malmal ye dada yo ke yeingi noonoo nga, inbe katattadaia Maro le kawete be ole kayemenaia tool yo iyei dada dook tiap nen i. Inbe ang ngan lomim be le kakamatau mulu a kapamedau le lok iken dook mata. Nen le ye so tina le imot yo kayei ye tool tani yo iyei noonoo i, ngan le kapatnai ang mallangana ben ang ngan taukamim busunu ye. 12 Le ye kene yo awodo rau tani pang ye in nga, ngan lok kaua urata ye tool yo iyei dada dook tiap i, too ye tool tani yo iyei dada dook tiap panga i, in tiap. Bong au i awodo rau pang nga, ngan be nen a ang tapmim kapaposang ye Maro matana ben ang ngan kagaua lomim le imot pam oo. 13 Ngan ye dada kiang yo nen i, in la kapamedam le lomam iken dook mata ye i.

Inbe yo ngan leu tiap, bong ye kene yo amlongo betanga ye dada dook mata yo kayei pang Titi nga, ngan lomam ponana le lomam ponana kaiye. Ngan nen, yesoo bong kapamede le lon modoko mulu tiap. 14 Muku ngan apayitang a awete pang Titi ye dada kiang yo kayei nga. Ngan moomook ye betanga kiau yo awete nga tiap, yesoo betanga le imot yo awete nga, ngan ikamata ben ngan moolmool le imot. Ngan gaongo leu, betanga yo amwete panga yang ngan moolmool, inbe betanga le imot yo amwete pang nga, ngan moolmool lapau. 15 Ye kene yo Titi imala yang ye in nga, ngan le katattadai a katangarur a kakauu, inbe kalongo betanga ki yo iwete pang nga. Ngan la nga lon tut dada kiang tina yo kayei panga ngan go, le nga lono pang le lono pang mai san. 16 Le nookoot nga au i lok ponana mai san, yesoo atara lok le imede yang nen, be ang ngan ole katoo Maro lono ye so le imot yo kayei nga.