30
Ị́jọ́ Ágụ̃rị̃ ꞌbã jọlé rĩ kî
1 ꞌDĩ kí ị́jọ́ Ágụ̃rị̃ Yãkẹ́hị̃ ngọ́pị ꞌbã jọlé rĩ kî; jọ ị́jọ́ ꞌdĩ kí Ị̃tụ́wẹ́lị̃ ꞌbaní Ụ̃kálị̃ be:
2 “Ma ꞌbá ꞌbá kí agá ꞌdâ azalépi ãndânĩ rĩ ꞌi;
ma ꞌbá kí agá ꞌdâ vãtáŋá kóru.
3 Ma ũndũwã kóru,
jõku ánị̃ ị́jọ́ ꞌBá Ãlá rĩ drị̃ gá ku rĩ.
4 ꞌBá tụlépi ꞌbụ̃ gâlé ãzíla asị́lépi vụ̃rụ́ ꞌdõlé rá rĩ ãꞌdi ꞌi?
ꞌBá ũlí amvulépi ĩꞌdidrị́ alé gá rá rĩ ãꞌdi ꞌi?
ꞌBá ị̃yị́ umbélépi bõngó sĩ rá rĩ ĩꞌdi ãꞌdi ꞌi?
ꞌBá vũ ꞌbã ãsị̃ŋá ụ̃ꞌbị̃lépi pírí rá rĩ ĩꞌdi ãꞌdi ꞌi?
Rụ́ lã ãꞌdi ꞌi,
ãzíla ngọ́pị̃ ꞌbã rụ́ ãꞌdi ꞌi?
Ílũ mání ídrĩ nị̃ la rá rĩ gá.
5 “Ị́jọ́ pírí Ãdróŋá drị̂ kí pịrị;
ĩꞌdi gọ́bẹ́rẹ́ ꞌbá apálépi ru zị̃lépi ĩꞌdi rụ́ rĩ ꞌbadrị̂ ꞌi.
6 Lẽ mí ũꞌbã ị́jọ́ ãzí ị́jọ́ ĩꞌdi ꞌbã jọlé rĩ drị̃ gá ku,
jõ íni ku ĩꞌdi uzá ími drị̃ gá ãzíla ĩꞌdi iꞌda la mi ĩnzóꞌbá rĩ gá rá.
7 “Úpí; ị́jọ́ mání aꞌị́lé mídrị́ rĩ kí ị̃rị̃,
mí uga mání kí ku ꞌdĩ sĩ ádrã drĩ ku rú fô:
8 Mí ĩdã ĩnzõ alị́jó ãzíla adrujó ĩnzóꞌbá rĩ kí má rụ́ ꞌdâ rá-rá ru,
ífẽ jõ má adru mání lẽmẽrí ru ku jõku málĩ trũ ambamba ku fô,
wó ífẽ mání íná ụ́ꞌdụ́ ãlu-ãlu sĩ rĩ ꞌbã adru cí.
9 Ádrĩ adru málĩ trũ ambamba, má icó jọlé la ími ãzị́ mání ꞌdáyụ,
ãzíla ma jọ la, ‘Úpí la ꞌdĩ dó ãꞌdi ꞌi?’
jõku ádrĩ adru lẽmẽrí má icó ãko ụ̃gụ̃lé sĩ drị̃nzá ajíjó Ãdróŋá mádrị̂ ní rá.
10 “Lẽ mí ũsõ ị́jọ́ ãtíꞌbó ụrụꞌbá gá ãmbógó ĩꞌdidrị̂ ní ku,
jõ íni ku ãtíꞌbô la ími wã rá ãzíla mi ị́jọ́ ịsụ́ rá.
11 “ꞌBá ãzí rĩ kí átẹ́pịka kí wãwã,
ãzíla fẽ kí ãwãꞌdĩfô ãndreka ꞌbaní ku.
12 ꞌBá ãzí kí ru ꞌbã ꞌbá ãlá ru kí drị̃ sĩ cénĩ,
wó íni ꞌdĩ ũnzõ kí ru ị́jọ́ ũnzí sĩ.
13 ꞌBá ãzí ri kí ũrã la kí ꞌbá múké la,
ãzíla kí ꞌbá ãzí rĩ kí ndre ãzị́ kóru;
14 ꞌbá ãzí kí sị́ ci cécé ménéŋá áni,
kálé ĩꞌbadrị̂ kí cécé ị́lị́ŋá áni,
kí sĩ ꞌbá ụ̃nọ́kụ́ drị̃ gá ꞌdâ lẽmẽrí ãzíla
ꞌbá ꞌbá kí drĩdríŋĩ gá ꞌdâ ãko kóru rĩ kí na.
15 “Drídríwú ꞌbã izonzi kí ị̃rị̃,
kí ị̃rị̃trá jọ la, ‘Ífẽ mání, ífẽ mání!’
“Ãko ãzí kí na mgbãrĩ gá sụ icó kí agalé ku:
16 ĩnádrị̃, mvájólé úndó rĩ,
ãngũ ị̃yị́ mvụlépi ị̃yị́ ꞌbã sĩ cajó ĩꞌdiní ku rĩ ꞌi,
ãzíla ãcí velépi ụtrị́lé tí rĩ kí abe.
17 “ꞌBá ápãrákã idélépi átẹ́pị sĩ
jõku ãndrẽ idelépi rĩ,
kúrúke kí mịfị́ la kí unze tilé rá
ãzíla Núgúnúke kí ĩꞌdi ĩzá ti rá.
18 “Ị́jọ́ ãzí kí na kí mání ụ̃sụ̃táŋá ru,
mgbã rĩ gá sụ mání ífí vãlé ku la kî:
19 gẹ̃rị̃ yụ́kụ́ ní ungajó ꞌbụ̃ gâlé rĩ ꞌi,
gẹ̃rị̃ ị̃nị̃ ní acị́jó írã drị̃ gâ sĩ rĩ ꞌi,
gẹ̃rị̃ mẹ́lị̃ ꞌbã acị́jó ị̃yị́ drị̃ gâ sĩ rĩ ꞌi
ãzíla gẹ̃rị̃ ágọ́bị́ ꞌbã sĩ ũkú lẽjó rĩ ꞌi.
20 “ꞌDĩ gẹ̃rị̃ ũkú ãwụ́ rĩ ꞌbã ị́jọ́ ngajó rĩ ꞌi:
ĩꞌdi ãngũ na rá, ĩꞌdi ru tị li ãꞌí ru
ãzíla ĩꞌdi jọ la, ‘Ánga ị́jọ́ ãzí ũnzí la ku.’
21 “Ụ̃nọ́kụ́ la ru aya ị́jọ́ na kî sĩ,
mgbã rĩ gá ị́jọ́ ĩꞌdi ꞌbã icólé tị talé ku rĩ kí sụ:
22 ãtíꞌbó ꞌbã acájó úpí ru rĩ ꞌi,
ꞌbá azalépi aza-azâ rĩ ní adrujó íná trũ ĩyõ rú rĩ ꞌi,
23 ũkú lẽlé ku rĩ ꞌbã ágó rụjó rá rĩ ꞌi,
ãzíla ĩzóŋá ãtíꞌbó ru rĩ ꞌbã ãmbógó ĩꞌdidrị́ ũkú ru rĩ ꞌbã ágó pajó rĩ ꞌi.
24 “Ụ̃nọ́kụ́ drị̃ gá ꞌdâ, ãko ãzí ĩmbíráŋá la kí sụ
wó ĩgãnã kí ũndũwã sĩ cí:
25 ĩyé kí ũkpó trũ were rú,
wó kí ãkónã tãmba ílí sĩ;
26 kílẽ kí ũkpó gã
wó ịsụ́ kí ãngũ ĩꞌbã kí sĩ uꞌájó rĩ idé ꞌbé agá;
27 úmbí kí úpí kóru
wó kí unga amụtị sĩ cécé ãsĩkárĩ kí áni,
28 mí icó lọ̃bọ̃drị̃ ꞌdụlé drị́ gá rá,
wó ĩꞌdi uꞌá ãngũ ũpi ꞌbã kí sĩ uꞌájó rĩ kí agá.
29 “Ãko ãzí kí na ĩꞌbã kí acị́ agá, kí acị́ ãfó sĩ ũniyambamba rú,
mgbã rĩ gá kí sụ kí acị́ ãfó sĩ:
30 kẹ̃mị̃ ndẽ ãnãkpá pírí kí ũkpõ sĩ rá
ãzíla idé ãnãkpá ãzí sĩ ụ̃rị̃ sĩ ku;
31 ãꞌụ́gọ́ ãfó ru rĩ, ị̃ndrọ́gọ́
ãzíla úpí ãsĩkárĩ ĩꞌdidrị̂ kí adrujó ĩꞌdi andre trộkị́lịrị rĩ ꞌi.
32 “Ídrĩ ándrá adru ꞌbá azalépi aza-azâ ru ịpị́lépi ãfó sĩ la,
jõku ídrĩ ándrá ị́jọ́ ũnzí itú,
mí ụ̃pị̃ ími tị ími drị́ sĩ cí!
33 Ídrĩ lẹ́sụ́ ꞌa usa, ĩꞌdi ãdu ũfũ rá,
ídrĩ ꞌbá ãzí ꞌbã ũmvu dị, ãrí la la ra rá,
ídrĩ ị́jọ́ kí usa ũmbã sĩ, ĩꞌdi ãwãŋá ajị́.”