26
1 Adru múké ku sĩ ị̃nzị̃táŋá fẽjó ꞌbá azalépi aza-azâ rĩ ní cécé sí ꞌbã zõŋá ãzíla uzogó ꞌbã ꞌdịŋá sáwã ãkónã trajó rĩ sĩ rĩ ꞌbã adrujó múké ku rĩ áni.
2 Áwãtáŋá icó ími idélé ũnzí ku ídrĩ ị́jọ́ ãzí ũnzí la idé ku rĩ gá.
Ĩꞌdi adru cécé ãríŋá ungalépi ungâ ãzíla alịlépi alị-alị̃ rilépi ku rĩ áni.
3 Íco fãrásĩ kẹ̃lị́ká íníríkó ru rĩ sĩ, mí umbé kãyĩnõ tị aya sĩ cí
ãzíla íco ꞌbá azalépi aza-azâ rĩ ꞌbã ũngúkú kẹ̃lị́ká sĩ.
4 Mí umvi zịtáŋá ꞌbá azalépi aza-azâ rĩ ꞌbã zịlé rĩ ku,
jõ íni ku mi aza cécé ĩꞌdi áni.
5 Mí umvi ꞌbá azalépi aza-azâ rĩ aza ĩꞌdidrị̂ ꞌbã vúŋá sĩ,
jõ ku ĩꞌdi ũrã la ꞌi ũndũwã trũ.
6 Míní wárãgã fẽjó ꞌbá azalépi aza-azâ rĩ drị́ gá rĩ ĩꞌdi cécé míní ími pá kí lịjó rá,
ãzíla míní ãdrákĩ mvụjó rĩ áni.
7 Ị́jọ́ ꞌbá azalépi aza-azâ rĩ ꞌbã uꞌbélé rĩ ĩꞌdi ãzị́ kóru
cécé ꞌbá acálépi rá rĩ ꞌbã pá ꞌbã adrujó ãzị́ kóru rĩ áni.
8 Ị̃nzị̃táŋá fẽjó ꞌbá azalépi aza-azâ rĩ ní rĩ ĩꞌdi
cécé írã umbéjó rõgbógbõ gá cí ĩꞌdi ꞌbã sĩ icójó ru vujó ku rĩ áni.
9 Ị́jọ́ ꞌbá azalépi aza-azâ rĩ ꞌbã uꞌbélé rĩ,
ĩꞌdi cécé ꞌbá ĩmẽrãlépi íwá sĩ rĩ ꞌbã ụ̃cị́kị́ ĩꞌdidrị́ sõlépi rĩ anzéjó rĩ áni.
10 ꞌBá ãzị́ fẽlépi ꞌbá azalépi aza-azâ jõku ꞌbá alịlépi alị-alị̃ rĩ ní rĩ
ĩꞌdi cécé ꞌbá ụ́sụ trũ rĩ ꞌbã ꞌbá kí ꞌa tõjó ꞌé sĩ mị́rị̃ rú rĩ áni.
11 ꞌBá azalépi aza-azâ rĩ la ị́jọ́ aza rú rĩ nga ị̃dị́
cécé ũcógó ꞌbã gõjó ụ́gbẹ́ ĩꞌdi ꞌbã gbẹlé rĩ mbejó ị̃dị́ rĩ áni.
12 Índre ꞌbá ru ꞌbãlépi ũndũwá ru cénĩ la rá yã?
Ásị́ tị̃ŋá ꞌbá azalépi aza-azâ rĩ drị̂ ndẽ ꞌbá ꞌdã áni rĩ rá.
13 Ũvúꞌbá la jọ la, “Kẹ̃mị̃ gẹ̃rị̃ gá ꞌdãá cí,
kẹ̃mị̃ ũmbá la gbọ̃kộ gâlé cí.”
14 ꞌBá ũvú rĩ la ru uja ĩꞌdidrị́ gbọ́lọ́ sị́ gâlé
cécé kẹ̃jị́tị ꞌbã ru ujajó pátã gá rĩ áni.
15 Ũvúꞌbá la ru drị́ su mgbi íná ãtĩjó rá,
wó ũvũ ambamba rĩ sĩ icó íná sulé tị gá ku.
16 ꞌBá ũvú rĩ ní rĩ gá índẽ ũndũwã sĩ ꞌbá ázị̂rị̃ ị́jọ́ umvilépi múké rĩ kí rá.
17 Míní fijó ị́jọ́ mî ãni ku rĩ agá rĩ ĩꞌdi cécé
ꞌbá ũcógó rụlépi bị́lẹ́ gá rĩ áni.
18 ꞌBá azalépi aza-azâ ꞌé sị́ ãcí rĩ gbẹlépi
ãzíla aválépi ãko sị́ ãcí rĩ sĩ rĩ
19 ĩꞌdi cécé ꞌbã ĩꞌdi ꞌbã jĩránĩ ulélépi jọlépi la,
“Ma tí mâ ngá avá agá avá avâ rĩ áni.”
20 Ijijá kóru ãcí la anụ́ rá;
ãndróndróŋá kóru ãwãŋá la adru yụ.
21 ꞌBá ãwãŋá lẽlépi ambamba rĩ la ãcóŋá fẽ iꞌdólé mbẽlẽŋá ru
cécé ãcíkúlú ꞌbã ãcị́pẹ̃lẹ̃ngụ́ akójó jõku ãcí ꞌbã ijijá akójó rĩ áni.
22 Ị́jọ́ jọlé káláŋá ru rĩ la fi íná ãjị́-ambamba rĩ áni;
ĩꞌdi fi ꞌbá ãrí gá.
23 Ị́jọ́ jọlé tị gá ꞌdâ ãlápítí ru wó ásị́ gâlé ị́jọ́ ndú la ꞌbã sĩ adrujó nĩ rĩ
ĩꞌdi cécé úmvú sịlé ũdrí sĩ sĩ ụrụꞌbá la asejó sílĩvã ĩzẽkí sĩ cí rĩ áni.
24 ꞌBá ásị́ ũnzí rĩ la ásị́ ũnzĩ ĩꞌdidrị̂ aꞌbó ị́jọ́ jọŋá múké rĩ sĩ;
wó ásị́ la ga tré úlétáŋá sĩ,
25 icó ru ꞌbãlé ꞌi ị́jọ́ múké rĩ jọ,
wó lẽ mí ãꞌị̃ ị́jọ́ ĩꞌdi ꞌbã jọlé rĩ ku ãꞌdusĩku ásị́ la ga tré ị́jọ́ ũnzí sĩ.
26 Drĩ táni ásị́ ũnzĩ ĩꞌdidrị̂ zị̃ ĩnzõ sĩ rá tí,
ị́jọ́ ũnzĩ ĩꞌdidrị̂ la amụ́ ru iꞌdalé ũꞌbí kí agá rá.
27 ꞌBá ꞌbụ́ ꞌdịlépi sĩ ꞌbá ãzí isíjó rĩ ꞌbã vúŋá la uja aꞌdélé ala gá nĩ;
ꞌbá írã lịlẹ́pi rĩ írã ĩꞌdi ꞌbã lĩlé rĩ la ãgõ ĩꞌdi vúŋá iꞌbélé.
28 Ĩdra ĩnzõ alị́lépi rĩ ngụ̃ ꞌbá ĩꞌdi ꞌbã sĩ ãzá fẽjó ĩꞌbaní rĩ kí ũnzí,
ãzíla tị ꞌbá ịpị́lépi ĩnzõ rú rĩ la ꞌbá ị̃lị̃kị̃ rá.