17
1 Ĩꞌdi múké íná ĩsá ị̃gbẹ́ rĩ najó ásị́ ị̃gbẹ̃ sĩ ãzíla ịjọjọŋá kóru
ndẽ lị́cọ́ ụ̃mụ̃ najó ãzíla sĩ ãwãjó ala gá ãwã-ãwã rĩ rá.
2 Ãtíꞌbó ũndũwã trũ rĩ la adru úpí ru úpí ngọ́pị drị̃nzá ajílépi rĩ drị̃lẹ́ gá;
ãzíla ĩꞌdi ãko úpí ꞌbã ngọ́pịka ꞌbadrị́ ãwítã rú rĩ kí awa ĩꞌba abe.
3 Ála gólũdĩ kí ụ̃ꞌbị̃ sílĩvã be ãcí sĩ,
wó Úpí la ásị́ ꞌbádrị̂ ụ̃ꞌbị̃ nĩ.
4 ꞌBá ị́jọ́ ũnzí idélépi rĩ kí ị́jọ́ are ꞌbá ũnzí rĩ kí tị gá;
ĩnzóꞌbá la ĩnzõ are ĩnzóꞌbá ãzí tị gá.
5 ꞌBá ꞌbá lẽmẽrí rĩ kí gụlépi rĩ la Ãdróŋá kí ũꞌbãlépi rĩ uꞌdá,
ꞌbá uꞌálépi ãyĩkõ sĩ ꞌbá drị̃lẹ́ ũnzĩ ịsụ́lépi rĩ sĩ rĩ ĩcẽ drị̃rịma ịsụ́ŋá gá ku.
6 Anzị ꞌbã áyị́pịka kí ru ũnũ anzị ĩꞌbadrị́ kí ꞌbã anzị kî sĩ,
ãzíla anzị kí ru ũnũ ĩꞌbã átẹ́pịka kí sĩ.
7 ꞌBá azalépi aza-azâ rĩ tị gá ị́jọ́ ãlá rĩ ãfũ ku,
ãzíla ĩnzõ jọjó rĩ sị úpí ngọ́pị ꞌi ku.
8 ꞌBá mịfị́ sajó séndẽ sĩ rĩ ĩꞌdi ꞌbá ãzí rĩ ꞌbaní cécé írúwá áni,
ꞌbá ãzí rĩ ãꞌị̃ kí rá ĩꞌdi drị̃lẹ́ba ají.
9 ꞌBá ꞌbá ãzí ꞌbã ị́jọ́ ũnzí trũlépi rĩ la lẽtáŋá ndrụ̃,
wó ꞌbá ị́jọ́ ũnzí sị́ nalépi ị̃dị́-ị̃dị́ rĩ la wọ̃rị̃ ãníyágágá rĩ iré rá.
10 Uzájó ꞌbá ị́jọ́ vãlépi rá rĩ drị̃ gá rĩ la ĩꞌdi ãzã ko múké,
ndẽ ꞌbá azalépi aza-azâ rĩ ị̃ndụ́ cojó kẹ̃lị́ká 100 wó ĩꞌdi ãzãkolépi ku rĩ rá.
11 ꞌBá ũnzí rĩ la mvu drị̃lẹ́ ĩꞌdidrị̂ rụ́ rĩ sĩ rá,
wó ála ãmbógó ásị́ ị̃gbẹ̃ kóru rĩ tị pẽ sĩ mụjó ĩꞌdiní drị̃rịma fẽjó.
12 Drị̃ ụfụjó ụ̃bọ̃gụ̃ mváŋá la ꞌdụjó rá rĩ be rĩ,
ndẽ drị̃ ụfụjó ꞌbá azalépi aza-azâ ĩꞌdi ꞌbã aza ngalépi rĩ be rĩ rá.
13 ꞌBá ị́jọ́ múké rĩ ãrígó tị ũfẽlépi ị́jọ́ ũnzí sĩ rĩ,
ị́jọ́ ũnzí icó ĩꞌdi ꞌbã lị́cọ́ aꞌbelé ku.
14 Ãwãŋá iꞌdóŋá ĩꞌdi cécé ị̃yị́ tị̃lépi ãngũ ãlu gá ãmbógó rĩ ꞌbã tị nzị̃jó rĩ áni.
Ị́jọ́ ꞌdĩ sĩ lẽ mí atrị ãwãŋá ꞌdĩ sĩ ĩmi andi drĩ ĩmi ku rú.
15 ꞌBá ị́jọ́ ũnzí idélépi rĩ aꞌbejó rĩ ãzíla ꞌbá múké rĩ drị̃ gá ị́jọ́ ũnzí lịjó rĩ be
Úpí ngụ̃ kí ị̃rị̃trá ũnzí.
16 Ála séndẽ fẽ ꞌbá azalépi aza-azâ rĩ drị́ gá sĩ ị́jọ́ ụ̃nị̃jó íngoní ru,
ịsụ́ ꞌdĩ sĩ ásị́sị́ŋá la gã ị́jọ́ ụ̃nị̃lé úmgbé?
17 Wọ̃rị́ la ꞌbá lẽ ụ́ꞌdụ́ pírí sĩ lẽlẽ,
wó útị ádrị́pị sĩ ꞌbá ãzã kojó sáwã ị́jọ́ ꞌbã ꞌbá ịsụ́jó rĩ sĩ.
18 ꞌBá ị́jọ́ nị̃lépi ku rĩ la drị́ tị̃ ĩꞌdi ꞌbã jĩránĩ ní sĩ dẹ́nọ̃ aꞌdụ́jó ãzíla ĩꞌdi pá tu gúrã rú.
19 ꞌBá ãwãŋá lẽlépi rĩ lẽ ị́jọ́ ũnzí,
ãzíla ꞌbá ị́jọ́ jọlépi ãfó sĩ rĩ la lị́kị̃ ndrụ̃.
20 ꞌBá ásị́ mũlũmbẽ rú rĩ icó ị́jọ́ múké rĩ kí ịsụ́lé ku;
ꞌbá ĩnzõ jọlépi rĩ la fi ị́jọ́ ũnzí agá.
21 Ngọ́tị́ŋá ũndũwá kóru rĩ la átẹ́pị̃ ní ũcõgõ ají;
átẹ́pị ngọ́tị́ŋá azalépi aza-azâ rĩ drị̂ ịsụ́ ãyĩkõ ku.
22 Ásị́ ãyĩkõ rú rĩ ĩꞌdi írúwá múké rĩ;
wó ásị́ ũcõgõ rú rĩ la ími fẽ drãlé jãjã rú.
23 ꞌBá ũnzí rĩ la ãko sĩ ꞌbá mịfị́ sajó rĩ ãꞌị̃ ũní-ũní ru;
sĩ ị́jọ́ lịŋá pịrị rĩ ujajó.
24 ꞌBá ị́jọ́ vãlépi rá rĩ la ũndũwã ꞌbã drị̃lẹ́ gá;
wó ꞌbá azalépi aza-azâ rĩ ꞌbã mịfị́ ndre ãngũ ãngũ ãlu gá ku.
25 Ngọ́tị́ŋá azalépi aza-azâ rĩ la ũcõgõ fẽ átẹ́pị̃ ní nĩ;
ãzíla ĩꞌdi ãndrẽ ĩꞌdi tịlépi rĩ ní ásị́ ãzá fẽ.
26 ꞌBá ị́jọ́ kóru rĩ ní drị̃rịma fẽjó rĩ adru múké ku;
jõku ꞌbá ị́jọ́ kpị rĩ ngalépi rĩ cojó rĩ adru múké ku.
27 ꞌBá ị́jọ́ nị̃lépi rá rĩ jọ ị́jọ́ mị́rị̃ rú ku;
ꞌbá ị́jọ́ vãlépi rá rĩ la uꞌá jã íni.
28 ꞌBá azalépi aza-azâ rĩ drĩ ĩyãŋã tú, ála ũrã la ĩꞌdi ũndũwã trũ;
ãzíla drĩ táni ĩyãŋã tú, ála ũrã la ĩꞌdi vãtáŋá trũ.