1 Nẽ arĩ mẽ kot Tĩrtũm kapẽr tũm kôt amnhĩ nhĩpêx o mẽ pa xwỳnhjaja kormã hprĩ hã Tĩrtũm kot tanhmã mẽ pahto mex to hã harẽnh mar tỳx kêt. Na prem kormã hkwỳ pix ma. Na hte mẽ õ patreja amgrà mẽ kànhmã kaxkwa hwỳr mry kamrôta pẽ nẽ mẽ amnhĩ to Tĩrtũm wỳ. Kot ja hã mẽ omunh nẽ axte mẽ kot amnhĩ tomnuj mã hamaxpẽr hkêt kaxyw. Tã ã mẽ kot amnhĩ nhĩpêx anhỹr tã arĩ Tĩrtũm kapẽr kwỳm amnhĩ nhĩpêx rãhã 2 jakamã na prem xatã kãm mẽmo mry kamrô runh o pa. Kêp apu tãm amnhĩ nhĩpêx nẽ tãm ri hamaxpẽr ronhỹx arĩ ã amnhĩ nhĩpêx anhỹr o pa hkêt nẽ. Nẽ xatã amnhĩ pãnhã mry hpar nẽ hkamrô ho Tĩrtũm nhõrkwỹ kaàkre kamã mẽmoj kamĩr kêt nẽ. 3 Nom na prem tãm amnhĩ nhĩpêx o pa hkêt nẽ. Mẽ kot amgrà mẽ Tĩrtũm kot mẽ nê mẽ kot amnhĩ tomnuj rênh kaxyw mẽ kot kãm mẽmo mry hpar o pa htã no ãm hkôt amnhĩ nhĩpêx xwỳnh ã amnhĩ jarẽnh kêt nẽ. Arĩ mẽ kot amnhĩ tomnuj o pa jakamã na prem mry hparta ã amnhĩ pumu nẽ tee ri amnhĩ kukamã hamaxpẽr o hkaprĩ nẽ pa. 4 Nom na hte môx kamrô rỳ motre kamrôja mẽ panê mẽ pahte amnhĩ tomnuj rênh kêt nẽ. 5-8 Jakamã na pre Krisja mẽ pahwỳr nojarêt nẽ Tĩrtũm mã amnhĩ jarẽnh o:

—E ixte amã hprãm xà hkôt amnhĩ nhĩpêx kaxyw kot paj ma mẽ hwỳr wrỳ.

10 Anhỹr jakamã wrỳ nẽ Tĩrtũm kãm hprãm xà hkôt mẽ panê ty. Na pre nhãm mẽhõ mẽ kãm hkurê xwỳnhjê mã õr nhũm mẽ kot hpĩr nhũm amarĩ htyk kêt nẽ. Na pre amnhĩ grônh kôt mẽ kãm amnhĩ gõ nhũm prem kupĩ. Hãmri nhũm htyk o mẽ pahte hkôt amnhĩ xunhwỳr xwỳnhjê o Tĩrtũm kra. Mẽ kot xatã mry hparta rom htyk tipxi tã mẽ pahpiitã mẽ pahte amnhĩ tomnuj pãnhã amnhĩrer pa.

11 Nẽ mẽ õ patrejaja na htem apkati mẽ Tĩrtũm nhõrkwỹ kaàkre kamã kãm tanhmã amnhĩ nhĩpêx to. Nẽ apkati mẽ hkwỳjê hpãnhã mry hkwỳ hpa nẽ hkamrô ru nẽ mẽ ho Tĩrtũm wỳ. Tã nom ja hã mẽ omunh xà hkôt mẽ nê mẽ kot amnhĩ tomnuj rênh kêt nẽ. 12 No kêt Kris na pre mẽ kot xatã mry hpar xwỳnhta rom ãm htyk tipxi htã mẽ pahte amnhĩ tomnuj piitã hpãnhã amnhĩre. Hãmri nẽ ma akupỹm kaxkwa hwỳr api nẽ Tĩrtũm nhĩhkô hã Pahi Maati hkrĩ xà kamã upôk rũm hkrĩ ho hkrĩ. 13 Koja kuri hkrĩ rãhã nhũm Tĩrtũmja ĩhkram mẽ kot kutã amnhĩ xunhwỳr xwỳnhjê jaxàr pa. Ja kaxyw na kormã kuri hamãr o hkrĩ. 14 ãm htyk tipxi htã htykja o mẽ pahte hkôt amnhĩ xunhwỳr xwỳnhjê ho Tĩrtũm kra pu mẽ ra hpãnhã tãm amnhĩ nhĩpêx rãhã ho papa. Nẽ pajamaxpẽr mex o ri papa. Tĩrtũm kãm hprãm xà hkôt.

15 Amnepêm mẽ kot Tĩrtũm nhỹ hã kapẽr jarẽnh o mẽ pa xwỳnhjaja na prem mẽ panhĩgêtjê mã kapẽr o pa. Tĩrtũm Karõ nhỹ hã mẽ kãm kapẽr nẽ mẽ kãm:

16 —E na Tĩrtũm mẽ pamã amnhĩ jarẽ nẽ amnhĩ jarẽnh o:

18 Tã ra axte mẽ pahte amnhĩ tomnuj mã hamaxpẽr kêt ã kot amnhĩ jarẽnh jakamã mo kaxyw kot pu mẽ arĩ amnhĩ pãnhã kãm mẽmo mry hpar nẽ hkamrô runh o papa? Tã mẽ pahkwỳjaja na hte arĩ kãm ja ho anhỹr prãm o pa. E kwa mẽ axte ã amnhĩ nhĩpêx anhỹr kêt nẽ ixkwỳjaja.

19-20 E ixkràmnhwỳjaja. Ra Jejus kot mẽ panê htyk o hkamrô pikapĩr jakamã na pu htem arĩ tee ri amnhĩ kukamã pajamaxpẽr hkêt nẽ. Tĩrtũm axte kot mẽ pahte amnhĩ tomnuj mã hamaxpẽr kêt jakamã na pu htem paxàmnhĩx amnhĩ to hwỳr o papa. Te paxàmnhĩx õrkwỹ kaàkre kamã hitom maati hwỳr pagjêx nẽ kamã amnhĩ to hwỳrta pyràk. Jao ra mẽ papamjaja amnhĩ to hwỳr o papa nhũm patre axte mẽ pahto hwỳr kêt nẽ. Jejus na pre htyk o mẽ pamã hitom maati wỳr hakwakre kahêxà hã kupẽxêja kôt ã ho axkjê. Jao mẽ paxàmnhĩx hwỳr mẽ pagjêx kaxyw mẽ pamã kahê xà mẽ. 21 Tã ra kêp Tĩrtũm nhõ krĩ kamã mẽ pahto hwỳr xwỳnh maati na. Nẽ mex kumrẽx o jar pika ja kamã patre kot mẽ ho hwỳr o pa xwỳnhta jakrenh. 22 Jakamã e kwa kêr pu mẽ mãmrĩ paxàmnhĩx amnhĩ to Tĩrtũm wỳr o papa. Ra Jejus kot mẽ panê htyk nhũm mẽ pahte amnhĩ kaxyw hkôt pajamaxpẽr rãhã ho papa jakamã kêr pu mẽ axte mẽ pahpê amnhĩ tomnuj xwỳnh ã amnhĩ jarẽnh kêt nẽ. Kêr pu mẽ nhỹrmã tanhmã pajamaxpẽr punuj to rỳ tanhmã amnhĩ tomnuj to hãmri nẽ tee ri ja hã amnhĩ pumu nẽ pahkaprĩ kamã amnhĩ to Tĩrtũm wỳr kurê kumrẽx. Jejus ra kot mẽ pahte amnhĩ tomnuj pãnhã amnhĩrer par jakamã kot puj mẽ Tĩrtũm mã tanhmã mẽ pahte amnhĩ tomnuj to hã amnhĩ jarẽ nhũm mẽ pama nẽ axte kãm hamaxpẽr kêt nẽ. Pu mẽ te paxwỳr nẽ pahte amnhĩ nê pagrã htyk kuhõnh par nẽ akupỹm pamex pyràk. Nẽ axte paxàmnhĩx amnhĩ to Tĩrtũm wỳr o papa.

23 Nẽ mẽ kot Kris ã tanhmã mẽ pahto htã kwa kêr pu mẽ tee ri amnhĩ kukamã pajamaxpẽr kêt nẽ. Rỳ pajamaxpẽr o:

—Konẽn. Koja mẽ tanhmã hamaxpẽr to nẽ Kris ã ixpĩ rỳ ko. Pa apu mẽ kot ixpĩr pymaj akupỹm ixte amnhĩ nhĩpêx tũm o awjanã nẽ akupỹm hkôt amnhĩ nhĩpêx japêr rỳ ko. Anẽ.

Kwa pu mẽ tee ri ã pajamaxpẽr anhỹr hkêt nẽ. Pu kêt mẽ pajamaxpẽr o:

—Nà mẽ kot Kris ã tanhmã ixto htã kot paj aa hkaga hkêt nẽ. Mẽ kot hã ixpĩr mã tã kot paj hkaga hkêt kumrẽx.

Anhỹr ã amnhĩ jarẽ. 24 Nẽ kêr ka mẽ akwỳjê mã anẽ kê mẽ mẽmoj to axpẽn kutã nojarêt rãhã ho ri axpẽn kôt pa. Jao tanhmã axpẽn to mex to o ri axpẽn kôt pa.

25 Na pre ra mẽ pahkwỳjaja tanhmã hamaxpẽr to nẽ axte mẽ pahkôt pikuprõnh nẽ Tĩrtũm kapẽr mar o hkrĩ hkêt nẽ. No kêr pu mẽ ho mẽ uràk kêt nẽ. Kêr pu mẽ arĩ xatã axpẽn wỳr akuprõ nẽ mẽ pahte tee ri amnhĩ kukamã pajamaxpẽr nê axpẽn mã pakapẽr o papa. Kêt mẽ panhõ Pahihtija ra akupỹn mẽ pahwỳr wrỳk kaxyw jakamã kwa kêr pu mẽ kutêp arĩ axpẽn mã pajamaxpẽr mex nhõr pê tãm axpẽn nhĩpêx mex rãhã ho i papa.

26 Mẽ pahkwỳjaja kot Tĩrtũm kapẽr mar mex tã na htem kuma nẽ ãm kuma. Kwa kêr ka mẽ ho mẽ uràk kêt nẽ. Kris kot mẽ panê htyk ã harẽnhja mẽ kot mar mex tã na htem kuma nẽ ãm kuma nẽ hkaga kumrẽx. Jakamã mẽhõ koja Kris pyrà nẽ htyk o mẽ kot amnhĩ tomnuj pãnhã amnhĩre? Nà amrakati kumrẽx. Ãm Jejus pix na pre Tĩrtũm ja kaxyw ãm. Tapxipix na pre ã mẽ panê amnhĩ nhĩpêx anẽ. Tã nhũm mẽ kot hkagaja mỳrapê koja mẽ nhỹrmã mẽ tãmjaja mẽ kot amnhĩ tomnuj pãnhã amnhĩre. 27 Mẽ kot Tĩrtũm kutã amnhĩ xunhwỳr xwỳnh na mẽ. Amnepêm na pre Tĩrtũm mẽ kot kutã amnhĩ xunhwỳr xwỳnhjê kaxyw mẽ kot amnhĩ xà htỳx kamã hamak tũm xàta nhĩpêx. Tã ra mẽ kot Jejus kaga jakamã koja nhỹrmã ma hwỳr mẽ rẽnh pa nhũm mẽ tee ri kãm hwỳr pa hprãm kêt kaprỳ. 28 Amnepêm finat Mojesja kormã htĩr ri na pre hte mẽhõ pixi nẽ kapẽr kaga nẽ akupỹm kot amnhĩ nhĩpêx tũm o awjanã nẽ tanhmã amnhĩ tomnuj to nhũm hkwỳjaja ja hã omu. Tanhmãn axkrut rỳ axkrunẽpxi nẽ ja hã omu. Hãmri nẽ ma Mojes wỳr mra nẽ axpẽn kôt kãm tanhmã kot amnhĩ tomnuj to hã harẽ. Hãmri nhũm harẽnh ma nẽ mẽ kãm hã amỹnê nhũm tee ri kãm htĩr prãm kaprỳ. Mẽ kot akupỹm amnhĩ nhĩpêx tũm o ujanãr nẽ amnhĩ tomnuj o paja mỳrapê na prem mẽ kupa. Ã na pre htem mẽ hipêx anhỹr o pa.

29 Nẽ koja mẽhõ tanhmã Tĩrtũm Kra Jejus o kapẽr punuj to. Tĩrtũm kapẽr ã kagà htũm kot ra mẽ kot kêp Tĩrtũm Kra hã harẽnh mar mex tã axtem nẽ tanhmã ho kapẽr punuj to ho pa. Kot mẽ panê htyk nẽ hkamrô pikapĩr kôt kot mẽ pahte amnhĩ tomnuj pãnhã amnhĩrer ã harẽnh mar tã kuma nẽ ãm kuma nẽ harẽnh o:

—Nà mẽ pahpyrà nẽ kot amnhĩ tomnuj xwỳnh nhũm mẽ kot hã hpĩr kênã. Na pre mẽ panê htyk kêt nẽ.

Anhỹr ã harẽ. Nẽ Tĩrtũm Karõja nhũm mããnẽn tanhmã ho kapẽr punuj to. Kêp mẽ pakutã nojarêt xwỳnh tã nhũm axtem nẽ tanhmã ho kapẽr punuj to. Mỳrapê koja nhỹrmã Tĩrtũm tanhmã homnuj tỳx to. Homnuj tỳx o mẽ kot Mojes kapẽr kaga nhũm mỳrapê kot mẽ hparta jakre. Jakamã kwa kêr ka mẽ ã amnhĩ nhĩpêx anhỹr hkêt nẽ. 30 Tĩrtũm kapẽr ã kagà htũm kot ja jarẽnh kot:

32 Nẽ amnepêm mẽ ate Jejus kôt amnhĩ xunhwỳr krax kãm na prem Jejus ã mẽ atomnuj tỳx tã ka prem mẽ umaj hkaga hkêt nẽ. Tã kêr ka mẽ arĩ ã amnhĩ nhĩpêx anhỹrja kukamã mãn ajamaxpẽr nẽ hã anohtỳx rãhã ho apa. Jao arĩ ã amnhĩ nhĩpêx anẽ nẽ mẽ umaj Jejus kaga hkêt nẽ. 33 Na prem mẽ piitã mẽ noo mã tanhmã mẽ amã kapẽr punuj to nẽ tanhmã mẽ anhĩpêx to. Nẽ tõhã tanhmã mẽ akwỳjê homnuj tỳx to ka mẽ tee ri ja hã mẽ omu nẽ mẽ kamã axukaprĩ nẽ. Nẽ mẽ hkôt axkamẽ nhũm prem mã mẽ ato anẽ nẽ. 34 Na prem mẽ akwỳjê jagjê ka prem ja hã mẽ omu nẽ ma mẽ hagjênh xà hã ixkre hwỳr mẽ hwỳr mra nẽ tanhmã mẽ ho mex to. Nhũm prem mẽ apê mẽ akukrêx kwỳptà nẽ ma amnhĩm o pa ka mẽ ãm amnhĩ tã mẽ omu nẽ ajamaxpẽr o:

—Kwãr mẽ mãmrĩ ma amnhĩm hamỳn o pa. Koja nhỹrmã Tĩrtũm inhmã ixkukrêx mex o kot ja jakrenhta kwỳ nhõr rax nẽ pa amnhĩm hamỳ nhũm aa ixpê hapêx kêt nẽ. Hãmri nhũm axte mẽhõ aa ixpê utàr kêt nẽ. Jar mẽ ixkukrêxta mexti hã. Anẽ.

Jao mẽ kot mẽ apê utàr tã ka mẽ akaprĩ nã apa hkêt nẽ. Ã amnhĩ kukamã ajamaxpẽr anhỹr pê akĩnh nẽ apa. Ãm hãmri na ka prem ã amnhĩ kukamã ajamaxpẽr anẽ. 35 Na ka prem mẽ kutã amnhĩ to htỳx kãm ã apa anẽ. Tã kwa kêr ka mẽ arĩ ã amnhĩ nhĩpêx anhỹr o ri apa. Kêr kê nhỹrmã Tĩrtũm ja hã mẽ ato mex rax nẽ.

36 Nẽ kêr ka mẽ arĩ amnhĩ kaxyw Tĩrtũm mã ajamaxpẽr rãhã ho ri apa. Mẽ kot Jejus ã tanhmã mẽ ato htã ka mẽ hkaga hkêt nẽ. Kot kaj mẽ ã amnhĩ nhĩpêx anhỹr o apa nhũm Tĩrtũm ja hã mẽ apumu nhũm ja kãm mex nẽ. Hãmri nhũm ra kot amnhĩ jarẽnh xà hkôt nhỹrmã amã mẽmoj mex nhõr rax nẽ. Jakamã kwa mẽ kot tanhmã mẽ anhĩpêx to hã amnhĩ pumu nẽ tee ri amnhĩ kukamã ajamaxpẽr o ri akaprĩ hkêt nẽ. Kot kaj mẽ Kris ã apunuj rãhã apa hkêt nẽ. 37 Tĩrtũm kapẽr ã kagà htũm kot Jejus jarẽnh kot: