1 Tã nhũm Pawre krĩ pê Atenas rũm kato nẽ ma krĩ pê Korĩt wỳr mõ nẽ pôj. 2 Hãmri nẽ nhỹri Akirti pumu. Haxwỳja kêp Ijaew. Krĩ pê Põt kamã na pre kato. Tã ma pyka pê Itar wỳr mõ nẽ Itar kamã krĩ pê Rõm kamã hpãnhã pa. Pa ho pa htã nhũm mẽ õ pahihti Krawti tanhmã hamaxpẽr to hãmri nẽ mẽ amnhĩ nê Ijaew piitã mẽ hanor pa. Jakamã nhũm Akirti kato nẽ hprõ Prisire mẽ wa ma Korĩt wỳr mõ. Hãmri nẽ hwỳr pôj nẽ kamã pa ho pa. Jakamã nhũm Pawre Korĩt wỳr pôj nẽ wa omu 3 nẽ wa kuri pôj nẽ wa hkôt ri pa. Nẽ Siras mẽ Ximotre wa kamã hamak pê wa ĩhkô hã àpênh o pa. Wa uràk nẽ kupẽxê pytĩ ho ixkre nhĩpêx nẽ ho wẽnê ho ri wa hkôt pa. 4 Hãmri nhũm sap kato nhũm ma Tĩrtũm kapẽr o mẽ ahkre xà hã ixkre hwỳr pa nẽ kamã mẽ kãm Tĩrtũm kapẽr jarẽnh o hkrĩ. Ijaew mẽ Ijaew kêt xwỳnhjê mã nhũm mẽ kãm ujarẽnh o hkrĩ. Nẽ mẽ kãm Jejus kot mẽ panê tanhmã amnhĩ nhĩpêx to hã harẽ.

5 Tã nhũm Siras mẽ Ximotre wa ma Masetõn rũm Pawre wỳr mõn pôj. Jakamã nhũm Pawre axte ixkre nhĩpêx ã àpênh kêt nẽ. Pãnhã apkati mẽ Ijaewjê jahkre ho pa. Mẽ kãm tanhmã Jejus jarẽnh to ho ri mẽ hkôt pa. Kêp Tĩrtũm kot mẽ pakaxyw ãm xwỳnh ã harẽnh o ri mẽ hkôt pa. Xatã mẽ kãm ujarẽnh o pa. 6 Nom nhũm mẽ kãm mar prãm kêt nẽ kamã gryk kato nẽ kãm kapẽr punuj nẽ. Nhũm Pawre tee ri amnhĩ tã mẽ kuma nẽ mẽ kãm:

—E ixte mẽ amã Jejus kot mẽ panê tanhmã amnhĩ nhĩpêx to hã harẽnh tã ka mẽ amã mar prãm kêt nẽ. Nà mẽ kam nẽ mẽ mãmrĩ ate amnhĩ tomnuj kãm ty nẽ arĩ kam amnhĩ pumu no ãm amnhĩ tã tanhmã inhmã nẽ hkêt nẽ. Ra mẽ ate Tĩrtũm kapẽr kaga kênã. Nà kot paj mẽ akaga nẽ ma hpãnhã Ijaew kêt xwỳnhjê hkôt ri mẽ kãm ja jarẽnh o ri ixpa. Anẽ.

Hãmri nẽ kànhmã xa nẽ hinôkà kapa nẽ ho apê. Mẽ kot hkaga hã amnhĩ pumunh kaxyw nhũm mẽ noo mã ã amnhĩ nhĩpêx anẽ. 7 Hãmri nẽ ixkre rũm kato nẽ hijuk ri Ijaew kêt xwỳnh pê Xijutre nhõrkwỹ hwỳr tẽ nẽ hpãnhã Xijutre hkôt pa ho pa. Xijutre kêp Ijaew kêt tã amnhĩ kaxyw Tĩrtũm mã hamaxpẽr rãhã ho pa.

8 Tã nhũm Ijaew õ pê Kriptija hkwỳjê rom amnhĩ kaxyw Pahihti Jejus kôt hamaxpẽr nẽ hkôt amnhĩ xãm. Kêp Ijaew nhõ Tĩrtũm kapẽr o mẽ ahkre xà hã ixkre kamã mẽ ahkre xwỳnh na pre. Jakamã õrkwỹ kamã hkwỳjê mẽ mẽ hpimrààtã Pahihti Jejus kôt amnhĩ xunhwỳr pa. Nẽ krĩja kamã ra Ijaew kêt xwỳnh ohtô nẽ Kripti pyrà nẽ amnhĩ kaxyw Jejus kôt hamaxpẽr nẽ hkôt amnhĩ xunhwỳ. Jakamã nhũm Pawre mẽ kêp Jejus kwỳ hã mẽ piitã mẽ hkrã kumrã.

9 Tã nhũm kamàt nhũm Pawre gõr nẽ nõ nẽ amỹti nhũm kêwe Pahihti Jejus axte hwỳr kato nẽ kãm kapẽr nẽ kãm:

—Pa Pawre? E kwa kêr ka mãmrĩ axàmnhĩx ri atar mẽ kãm ijarẽnh rãhã ho ri apa nẽ amnhĩ kamã akahak o ri mẽ hkôt apa hkêt nẽ. 10 Kot paj atãnopxa nhũm mẽhõ tanhmã ato hkêt nẽ. Krĩ ja kamã koja mẽ ohtô nẽ ixkôt amnhĩ xunhwỳ. Anẽ.

11 Nhũm pre ã Pahihti Jejus Pawre hpimtir kãm kãm kapẽr anẽ. Jakamã nhũm Korĩt kãm arĩ ri mẽ hkôt pa ryy nẽ. Arĩ mẽ hkôt pa hã amgrà pyxi nẽ hkôt mytwrỳ kêp 6. Jao Tĩrtũm kapẽr o mẽ ahkre ho ri mẽ hkôt pa.

12 Tã nhũm Korĩt nhõ xwỳnhjê nhõ pika pê Gres kamã mẽ ho amnhĩptàr xwỳnh nyw Gartija. Korĩt kãm pa jakamã nhũm Ijaew xàptàr tũmrejaja Pawre pynê nẽ ma hwỳr o tẽ nẽ kãm tanhmã ho hêx to. 13 Jakamã nhũm Ijaew pikuprõnh xà hã ixkre kamã mẽ kãm kapẽr xwỳnh Sostenesja Garti mã Pawre o hêx nẽ kãm:

—Kwa jahti na hte mẽ ixpê Ijaew kot amnhĩ nhĩpêx kwỳm ri mẽ ahkre ho pa. Jao mẽ ixte axtem nẽ tanhmã Tĩrtũm kôt ri amnhĩ nhĩpêx to ho ri ixpa kaxyw mẽ inhmã karõ ho pa. Nom mẽ ixte amnhĩ nhĩpêx kuhpa hã mẽ inhmã karõ. Anẽ.

14 Hãmri nhũm ra Pawre kot Garti mã amnhĩ jarẽnh mã tã nhũm Garti amnhĩ to wa nẽ hã mẽ kãm kapẽr nẽ mẽ kãm:

—Tk. Kwa kot tanhmã amnhĩ tomnuj tore hã. Kot tanhmã amnhĩ tomnuj to nhũm mẽ ate inhmã harẽnh ronhỹx pa arĩ mẽ ama nẽ tanhmã mẽ amã hipêx to. 15 No xep ãm kot mẽ axàptàr tũmrejaja kot amnhĩ nhĩpêx kuhpa hã pix mã kot amnhĩ nhĩpêx o pa kênã. Nẽ mẽ ate mẽ ahkre kuhpa hã kot ri mẽ ahkreja pix mỳrapê na ka mẽ kamã agryk nẽ ã inhmã ho akapẽr anẽ. Nà kot paj ja hã tanhmã ho hkêt nẽ. Ka mẽ kam nẽ amnhĩ krã hkôt tanhmã ho hprãm xà hkôt tanhmã ho. Anẽ.

16 Hãmri nẽ amnhĩ nê mẽ hano. 17 Hãmri nhũm mẽ tee ri kuma nẽ ra Sostenes kamã gryk nẽ. Kot Garti mã tanhmã Pawre jarẽnh to htã nhũm kuma nẽ ãm mar jakamã nhũm mẽ hã Sostenes kamã gryk. Hãmri nẽ unê nẽ Garti noo mã htak o xa. Nẽ htak rax nẽ. Nom nhũm hã mẽ omu nẽ ãm mẽ omu nẽ nê tanhmã mẽ kãm nẽ hkêt nẽ.

18 Tã nhũm Pawre arĩ Korĩt kamã mẽ hkôt pa nẽ gaa nẽ nojarêt nẽ Jejus kôt htõjê mã amnhĩ jarẽ nẽ mẽ kãm:

—E kot paj ma akupỹm pika pê Sir wỳr mõ. Anẽ.

Hãmri nẽ mẽ kêp kato nẽ ma hwỳr mõ. Nẽ ma amnhĩ kôt Akirti mẽ hprõ Prisire wa o mõ. Mõõ nẽ krĩ pê Sẽnkrej wỳr pôj. Nhũm Pawre amnhĩ kukamã mẽmoj tã tanhmã Tĩrtũm mã amnhĩ jarẽnh to nẽ amnhĩ jarẽnh xà hkôt amnhĩ krã hkênh pa. Ijaew kot amnhĩ nhĩpêx xà hkôt ã amnhĩ nhĩpêx anẽ. Hãmri nẽ mẽ pàr wỳr agjê nẽ Sẽnkrej rũm kato nẽ ma Sir wỳr mõ. 19-21 Mõõ nẽ krĩ pê Epes wỳr pôj. Hãmri nhũm Pawre mẽ hkwỳjaja pàr rũm hapôj nẽ krĩ hwỳr agjê nẽ Ijaew nhõ Tĩrtũm kapẽr o mẽ ahkre xà hã ixkre hwỳr mra nẽ hwỳr agjê nhũm Pawre mẽ kãm Tĩrtũm kapẽr jarẽnh o nhỹ. Hãmri nhũm mẽ kuma nẽ kãm mar prãm nẽ. Nẽ kãm:

—Kwa anojarêt kêt nẽ. Kritpêm mẽ ixkôt ri apa ryre nẽ Tĩrtũm kapẽr o mẽ ijahkre. Mẽ inhmã ja mar prãm.

Anhỹr tã no nhũm mẽ kãm:

—Nà kot paj ma mõ. Nom koja Tĩrtũm nhỹrmã akupỹn mẽ awỳr inhmẽ pa man akupỹn mẽ awỳr mõ nẽ axte kapẽr o mẽ ajahkre. Anẽ.

Hãmri nẽ ma mõ. Ma Epes rũm pàr kãm mõ. Nom nhũm Akirti mẽ Prisireja wa Epes kamã arĩk nẽ hpãnhã kamã pa ho pa.

22 Tã nhũm Pawre krĩ pê Sejarej wỳr pôj. Hãmri nẽ hpãnhã kurũm ma akupỹm Jerujarẽ hwỳr mõ. Kot Jejus kôt htõjê pumunh mã ma mẽ hwỳr mõ. Hãmri nẽ mẽ hwỳr pôj nẽ mẽ omu nẽ tanhmã mẽ kãm amnhĩ jarẽnh to nẽ mẽ kêp kato nẽ ma akupỹm ãxiok wỳr mõ. 23 Hãmri nẽ hwỳr pôj nẽ kamã mẽ hkôt ri pa ryy nẽ mẽ kurũm kato nẽ hpãnhã ma akupỹm pyka pê Prik mẽ Karatas wa hwỳr mõ. Nẽ kamã mẽ kot Jejus kôt amnhĩ xunhwỳr xwỳnhjê jahkre ho pa. Mẽ kot Jejus kôt amnhĩ nhĩpêx tỳx rãhã ho pa kaxyw mẽ hkôt mẽ ahkre mex o ri mẽ hkôt pa.

24 Tã nhũm Epes wỳr Ijaew õ pê Aporja mõ nẽ hwỳr pôj. Krĩ pê Aresãn kamã na pre kato. Na pre hte amnhĩ kaxyw Tĩrtũm kôt pix mã hamaxpẽr nẽ kapẽr ã kagà htũm mar tỳx nẽ. Jakamã mẽ kãm harẽnh mex o pa nhũm mẽ piitã kãm mar prãm nẽ. 25 Nom kormã Jejus jarẽnh jatur xà mar kêt jakamã ãm mẽ kãm hkrax pix jarẽnh o pa. Juãw Paxis kot tanhmã mẽ ahkre htoja nhũm mar tỳx nẽ. Nẽ tanhmã kot mẽ hkrã kumrãr to ho paja nhũm mããnẽn mar tỳx nẽ. Jakamã na pre hte mẽ kãm ja pix jarẽnh o pa. No Jejus kêp Tĩrtũm kot mẽ pahwỳr mẽnh xwỳnh ã harẽnhja nhũm kormã mar kêt nẽ. Tã Epes wỳr mõ nẽ pôj. 26 Hãmri nẽ Ijaew nhõ Tĩrtũm kapẽr o mẽ ahkre xà hã ixkre hwỳr axà nẽ kamã mẽ kãm ujarẽnh o nhỹ. Amnhĩ kamã kahak kêt nẽ àmnhĩx ri mẽ kãm ujarẽnh mex nẽ. Hãmri nhũm Prisire mẽ Akirti wa kot mẽ kãm ujarẽnh ã kuma nẽ war axpẽn mã:

—Kwa mãn kormã Jejus jarẽnh piitã mar kêt. E pu amnhĩ kôt panhõrkwỹ hwỳr o tẽ nẽ pahprĩ hã kãm harẽnh jatur xàm kumẽ kê hprĩ hã mar pa. Anẽ.

Hãmri nẽ war amnhĩ kôt kuwỳ nẽ hprĩ hã kãm ujarẽnh jatur xàm kumẽ nhũm hprĩ hã harẽnh piitã mar tỳx nẽ.

27 Tã ra pyka pê Gres wỳr nojarêt nẽ Jejus kôt htõjê mã amnhĩ jarẽ nhũm mẽ kuma nhũm ja mẽ kãm mex nẽ. Hãmri nẽ Gres kamã Jejus kôt mẽ htõjê mã kagà nhĩpêx. Apor kot mẽ hwỳr amnhĩ kôt o mõr nẽ mẽ kãm õr nhũm mẽ kot omunh nẽ kamã harẽnh nẽ ho mex kaxyw mẽ kãm hipêx. Hãmri nẽ hipêx pa nẽ kãm kugõ nhũm kupy nẽ mẽ kurũm kato nẽ ma mẽ hwỳr mõ. Hãmri nẽ mẽ hwỳr pôj. Gres nhõ xwỳnh kwỳjaja na prem ra Jejus kôt amnhĩ xunhwỳ. Tĩrtũm kot mẽ kutã nojarêt jakamã nhũm mẽ ra hkôt amnhĩ xunhwỳ. Jakamã nhũm Apor mẽ hwỳr pôj hãmri nẽ mẽ ĩhkô hã tanhmã mẽ ho ajuta hto ho pa. 28 Nẽ xatã Ijaew mã tanhmã Jejus jarẽnh to kamã hihtỳx o mẽ hkôt pa nẽ mẽ kãm:

—Nà Jejusja tãm na pre Tĩrtũm mẽ pakaxyw ãm. Tĩrtũm kapẽr ã kagà htũm kamã ã harẽnh kot anhỹr. Anẽ.