1 Ritonõpo Jesemy, Ypynanohne, saereme ahtao

yxitary poko kohmãnõko ase,

koko roropa oẽpataka oehnõko ase.

2 Jotururu oya etako;

otato exiko kui karyhtao ya jakorehmapory poko.

3 Popyra ehtoh tuhke toehse ya exiryke,

joorihtoh ameke pyra toehse.

4 Imehnõ orihsasaka exiketõ sã ase;

tapotũkehse exikety sã ase.

5 Turumekase ywy aorihtyã ekepyry tõ rãnao;

soutatu tõ ekepyry sã ase, tõmase zonẽtoh aka;

mokaro sã ase tuenikehse aexihpyry sã oya,

towomase okohmasaromepyra mã toto.

6 Tõmase ywy oya aorihtyã ekepyry esaka,

7 Yzehno oehtoh omoxinety sã ypoko nase,

opoe pohkane tõ jakurihmõko mana.

8 Turumekapose ywy oya jepe tomo a,

nuriame exiketyme jenẽko mã toto.

Ãpuruhpyry tao exiketyme sã ase, epasaromepyra ase.

9 Jetuarimary ke jenuru tonukehse sã mana.

Ritonõpo Jesemy, kokoro rokẽ okohmãko ase,

jemary anỹnõko ase jotururume oya.

10 Ajamitunuru kurã enepõko mah aorihtyamo a?

Ẽsemãnõko ropa toh nae oeahmaryme eremiatohme?

11 Otarame aorihtyã ekepyry esao oturũko mã toto yna pyno oehtoh poko, nary!

Moroto enahkahpyry po oturũko toh nae

12 Otarame moroto xinukutumã ao ajamitunuru kurã osenẽko? Otarame moroto tuenikehse ehtoh po anamonohpyra oehtoh enẽko toh nae? Nary!

13 Ritonõpo Jesemy, okohmãko ase, kuakorehmako; kokoro rokẽ ẽmepyry ae oturũko ase oya.

14 Oty katoh jurumekãko mah, Ritonõpo? Oty katoh otonẽnõko mah ywinoino?

15 Poetome jehtopõpyry poe toetuarimase ywy,

jorikyry ameke pyra nexiase; tapotũkehse ywy, omoxĩ sã juãnohtoh oya mana.

16 Zehno oehtoh ypona toehse pohkane konõto samo; japoijapoiry ke jenahkãko mase.

17 Jomyehmãko yzehno oehtoh mana zueme ehtoh samo; tapuruse ywy eya xine, tyneryse sã ase zue ao.

18 Oya turumekapose ywy jepe tomo a, ypyno exiketomo a, seromaroro ikohmamyry rokẽ tynamase jepeme.