30
Ritonõpo omiry kure Izyraeu tõ riry poko
1-3 Mame Ritonõpo, Izyraeu tõ Esemy ynara tykase ya:
— Jeremia, ynekarohpyry oya imeroko pape pokona emero, ynara exiryke, okynã pyra ypoetory tõ enehpõko ropa ase, Izyraeu tomo te, Juta tõ roropa. Mokaro enehnõko ropa ase moro nono pona ropa ynekarohpyry itamuru tomo a. Moro nono esẽme exĩko ropa mã toto. Ywy Ritonõpo oturuno.
4 Ritonõpo Kuesẽkõ ynara tykase Izyraeu tõ poko Juta tõ maro:
5 “Kui katoh totase ya, tonaroxitapãse, kui katoh enaromỹke, torẽtyke roropa ipunaka.
6 Apoaporo, osenetupuhtoko!
Orutua poeto enurũko nae? Nary!
Naeroro oty katohme mokaro orutua kõ enẽko
ywy emero tuakurukõ apoĩko, nohpo,
poetoẽme exikety samo, enurusasaka ahtao?
Oty katohme ẽmytykõ tytyorõtase nae?
7 Moro ẽmepyry, popyrahxo ehtoh oehnõko mana!
Imepỹ ẽmepyry moro ẽmepyry sã pyra mana ipunaka.
Jako pakomotyã etuarimãko yronymyryme,
yrome typynanohsẽme exĩko mã toto moro poe.”
8 Ritonõpo Jamihmehxo Exikety ynara tykase:
— Moro ẽmepyry toehse ahtao ipymyrykõ winoino irohmanohpotohkõ hmõko ase, imyhtoh tonõ keti tõ oũko roropa ase. Mame imehnõ namotome exipyra ropa exĩko mã toto. 9 Yrome, ywy Ritonõpo, toto Esemy omipona exĩko mã toto, Tawi pary poetoryme roropa exĩko mã toto, ynekarohpyry eya xine toto esẽme.
10 “Ypoetory tomo, Jako pakomotyamo, enaromyra ehtoko!
Izyraeu tomo, oserehpyra ehtoko!
Opynanohtorỹko ase moro nono moe exikety poe,
moro nono põkõ namotome oehtohkõ poe.
Oehnõko ropa matose, Jako pakomotyamo.
Towomasẽme exĩko matose;
oenaroximara xine exĩko imehnõ mana.
Ywy Ritonõpo oturuno.
11 Amaro xine exĩko ase opynanohtohkõme.
Imeimehnõ nonory enahkapõko ase, emero
aaropotopõpyrykõ ya, yrome oenahkara xine ase.
Tuãnohsẽme exĩko matose repe;
yrome, awãnopyrykohtao ya,
zae rokẽ awãnohtorỹko ase; onymotyẽkara ase.
Ywy Ritonõpo oturuno.”
12 Ynara tykase Ritonõpo pata Jerusarẽ põkomo a:
“Popyra oehtohkõ kurãkatoh pyra mana,
ãpurotopõpyrykõ etyhpyra mana.
13 Ahno pyra mana opyno exiketyme.
Opi pyra mana ãpurotoh tonõ epityme.
Ekurãkasaromepyra osekarõko matose.
14 Opyno aexityã emero tuenikehse mã toto opoko,
opoko penetara toehse mã toto.
Amaro tõsetapase ywy, jepekarame awahtao samo.
Awãnohtopõpyry jetuhxo nexiase oya oorypyry tuhke exiryke, popyra oehtoh itamurume exiryke roropa.
15 Atakirimara exiko ãpurotopõpyry poko, okurãkatoh pyra exiryke.
Kuãnopyase moro saaro oorypyry tuhke exiryke, popyra oehtoh itamurume exiryke roropa.
16 Yrome seromaroro mokaro emero oenahkananõ tonahkasẽme exĩko,
oepetõkara emero tarosẽme exĩko mã toto imehnõ namotome.
Orohmanohponanõkõ tyrohmanohposẽme exĩko mã toto,
omõkomory ematonanohnanõ tomatonanohsẽme exĩko mã toto.
17 Oepetõkara ynara ãko mã toto opoko xine:
‘Xião typahsẽme rokẽ toehse,
ise pyra toehse mã toto!’
Yrome kure rokẽ orĩko ropa ase,
ãpurotoh kurãkãko ropa ase.
Ywy Ritonõpo oturuno.”
18 Ynara tykase Ritonõpo:
“Jako pakomotyã enehnõko ropa ase inonorykõ pona ropa.
Emero tapyi taõkõ pynanohnõko ase.
Jerusarẽ tyrisẽme ropa exĩko mana,
tuisa tapyĩ konõto tao ahno exĩko ropa.
19 Moro põkõ eremiãko mã toto Ritonõpo eahmãko,
kohtãko mã toto tãkye toexirykõke.
Toto emãkapõko ase,
aomirykõ etary se exĩko imehnõ mana imehxo exiketõ samo.
20 Jamihme exĩko ropa mã toto pake toto ehtopõpyry samo.
Jekyry tõ maro orẽpyra exĩko ropa mã toto.
Toto ryhmananõ wãnohnõko ase emero.
21-22 Mame mokaro kowenatume jekyry tõ exĩko mana,
ynarorome ro exĩko mana.
Mokyro eahmaryhtao ya oehnõko ya mana.
Imehnõ ya oehsaromepyra exĩko oneahmara ahtao.
Ypoetoryme exĩko mã toto.
Toto Esẽme exĩko ase.
Ywy Ritonõpo oturuno.”
23-24 Zehno Ritonõpo ehtoh tyryrykane konõto sã mana, tyryrykane jamihme exikety tyryry ãko popyra exiketõ zupuhpyry pona. Moro zehno Ritonõpo ehtoh enahpyra mana aosenetupuhtoh ritoh pona Ritonõpo a emero. Imeĩpo kure rokẽ morohne enetupuhnõko ipoetory tõ mana.