LIPA ORA SIRIMU
Pe Wendo Ombá Mele Karasini Jono U LIPA ORA SIRIMU Bokumu
I Bokumunga Ungu-Pulu Mare
I bokumu ye Jonone torumu (1:1,4,9, 22:8). Aku-sipa na-kolo Jono semonje? Yombo awisilini pilkuli ‘I ye Jono yu Yesusini “Nanga kongonomo sende-paa.” nimba lipa mundorumu yemanga ye Jono.’ ningu pilielemele (Mateyu 10:2). Aku liemu Semane Peangamo kinia pepá yopoko kinia i bokumu kinia ye selumuni torumu.
Jonone i bokumu torumumunga ungu-pulu se i-sipa: Romo ye paa awili kumbina Sisamone nimbale: “Pulu ye se molio kene nokolio yombomane pali na kape ningu popo tangi.” nimba ungu-mane se sipa panjerimu. Aku-na-kolo Juda yomboma kinia Karasinga yomboma kinia ononga Pulu Ye selu mindi ‘Pulu Yemo’ ningu popo toko kape ningu imbi ambolko paka tondoringimunga “Sisamo paa naa popo tomolo. Mólo.” niringi. Karasinga yombomane “Mólo.” niringimunga Romo gapomanomone ononga yombo awisili mindili sipa ka sipa ono sepa kinjerimu. Jono kepe nomuna kolea kanga se lierimu akuna ka sipa panjerimu. Patemosi akuna pepale i bokumu torumu (1:9, ma-koleamanga pikisamo gomo 1213).
Jonone pepá torumu unguma yuyu konopumuni pilipale naa torumu. Yesusini yu lipa ora sirimu uluma kanopale pepá torumu (1:10-11). Kanu ulu kanorumumanga ulu mare olio naa molamili u sika kamu wendo orumunje, naa pilielemolo. Ulu mare sika pe wendo ombánje (1:1,19). Aku-sipa na-kolo ulu mare kinia méle mare kinia kanorumu akuma sika mélema mólonje. Ungu-ikuma perimu. Ungu paa awisili ungu-iku torumu, akumanga ungu-pulumu yombo marene ungu awisili angelema nilimili.
Kurumanga nokoli Setene yu sika tondolo pulimú-na-kolo yunga tondolomo mania purumu pumbá; Pulu Yemonga Sipisipi Walomonga tondolo olandopamo sika paa pelemo pembamo. Pulu Yemonga opa-touma wendo onge, umbuna mare sika wendo ombá-na-kolo Yesusi sika walte omba Setene kamu topa mania mundupa yunga yomboma lipa memba pumbála, yu kinia pea kamu molopo kondomolo. ‘Akumu pilkuli Karasinga yomboma Yesusi tondolo munduku ambolko molko, ungu talo pea naa pilku, ungu sikamo munduku naa kelko, taka leko molangi.’ nimba pepá torumu. Ungu mare i-siku kanoko piliani: 2:10, 3:10; 2:13, 6:9; 2:14-15.
Pulu Yemo kinia Yesusitolo kape ningu olonga imbi ambolko paka tondoringi ungu awisili molemóla. Umbu-Unguna topele tomolondo pererimulu-na-kolo ungu paa peangama. Paa kanokole aku sikula olo kape ningu imbi ambolko paka tondaa! I unguma kanangi: 4:8,11, 5:9-10,12,13ekendo, 7:10,12, 11:15,17-18, 12:10-12, 15:3-4, 16:5,7, 19:1,5-7.
Ungu-pulu pokore boku ambolkonomonga pealemekondo “24. laip”, “44.3. Pikinini Sipsip” molemo.
Ya ungu-pulumu pora nikimu.
1
Kolomongo-Awili 1-3
Karasinga Yombo Talape Yopoko-Pakara Moloringina Jonone Pepá Topa Mundorumu Unguma
1:1-3
Boku Tombando Pulu Polopa Torumu Ungumu
1 Pe wendo ombá mele Pulu Yemone ‘Yunga kendemande yomboma piliangi.’ nimba Yesusi Karasi lipa ora sirimu mele inia molemo. ‘Olio piliamili.’ nimba Yesusi Karasi yuni yunga angellomo na yunga kendemande ye Jono molorunduna lipa mundorumu. 2 Nane kanorundu mele pali nimbu para sikiru. Pulu Yemonga unguma kinia, Yesusi Karasini “Pulu Yemone nilimú unguma sika-unguma.” nilimú mele kinia, lipu ora sikiru.
3 Pe wendo ombá mele i bokuna nimba silimú unguma yomboma pilku molangi kanoko ningu singí yomboma kinia, bokuna molemo unguma pilkuli konopumanga mondoko pilingí yomboma kinia ono Pulu Yemone “Konopu peanga pepili molko kondangi.” nilimú aulkana molonge. Ulu wendo ombá nilimúma nondopa wendo ombá akumunga, aku siku senge yomboma ono Pulu Yemone “Konopu peanga pepili molko kondangi.” nilimú aulkana molonge.
1:4-8
Jonone “Molko Kondaa.” Nirimu Ungumu
4 Ono kolea Esia poropinji Karasinga yombo talape yopoko-pakara molemelena na Jonone i pepámo topo sikiru.
We kondo kololi ulu-pulumu kinia konopu pe nili ulu-pulumu-tolo ono-kinia pepili. U molorumu, kiniá molemo, pe ombá Pulu Yemone aku ulu-pulutolo sipili. Kanu yemo molopa koleama nokolemo koleana wendo olemele mini yopoko-pakarane aku ulu-pulutolo siengila. 5 Yesusi Karasi, Pulu Yemonga unguma kolo naa topa sumbi sipa nimba silimú yemo, yombo kololima lomboroko ola molonge yombomanga yu kumbi lepa lomboropa ola molorumu yemo, ma-koleana pali molemele ye nokoli awilimanga ye nokolimu molopa nokolemo ye nokoli paa awilimu, yuni aku ulu-pulutolo ono sipilila.
Olio konopu mondolemo yemo, yuni yunga meme ‘olionga’ nimba ondondorumu mememone olionga ulu-pulu-kirima ‘Mania pupili.’ nimba kulu tondopa, 6 ‘Yunga Lapa Pulu Yemonga kongonomo sendangi.’ nimba ‘Olio yu-kinia mélema nokopo molopo, Pulu Yemo popo tondoli yomboma molangi.’ nirimu yemo, yunga imbimu alieli-alieli paa ola molopa, yomboma nokomba tondolomo yu-kinia kamu alieli-alieli pepa mindi pupili. Aku sipa wendo opili.
7 Kaname! Yu kupana molopa ombá sepa molemo.
Ombá kinia yombomane pali
ononga mongomone kanonge.
Yu toko kondoringi yombomane kanongela.
Yu ombá kinia
ma-koleana yomboma pali kola awili-seko senge.
Sika aku sipa wendo ombá.
Aku sipa sepili.
8 Tondoloma pali yu-kinia pelemo Pulu Ye Awilimuni nimbale: “Na u kumbi lepo molorundu pe akilepo molombo yemo.” nikimu. Kanu Yemo yu kiniá molemo mele u molorumu, pe ombá yemo.
1:9-20
Jonone Karasi Kanorumu Semanemo
9 Na ononga genu Jono, ono-kinia olio Yesusinga yomboma molemolomonga mindili nombo umbuna melemolo. Mindili molo umbuna se wendo olemo kinia ‘Olio mindilima we namili.’ nimbu tondolo mundupu molopo, olio Pulu Yemo ye nokoli kingimu molopa nokolemo talapena molemolo yomboma. Na Pulu Yemonga unguma yomboma nimbu sipu, Yesusinga semanemo topo siliumunga na ka siku nomu-kusana sukundu ma-kanga lemó akumu ‘Kolea Patemosi’ nilimili akuna ka siku mengo oringi molio. 10 Ye-Awilimunga wale se wendo orumu kinia Mini Kake Sélimuni na molorunduna omba na ambolorumu kinia nanga bulkundu ungu tondolo se, bikollo mele, pilierindu. 11 Aku ungu nirimumuni nimbale: “Nu mongone kanoni mele pepána tokole Karasinga talape yopoko-pakara, Epesasi kinia, Simena, Pekamame, Tayataira, Sadisi, Pilladepia, LLadosia kinia, aku taonomanga Karasinga yombo talape molemelemanga pepá toko mundani.” nirimu.
12 ‘Nawene nikimunje?’ nimbu bulkundu topele topo kanorundu kinia kou-gollone seli sepe-llame yopoko-pakara lierimu kanorundu. 13 Kanu sepe-llamema lierimu suku-singina ye se gilierimu, yu mana-ye none seli se, yu ye nokolimane selemele mele wale-pakoli sulu se pakopa kimbu aki topa, kou-gollone seli kako mele se uluwina lierimu. 14 Yunga pengemo kinia penge-indi pali paa kake sélimu, yu kongi sipisipimanga indi kinia kalopora kinia akutolo kake selemo mele serimu. Yunga mongotolo sepe mele tondolo pa serimu. 15 Yunga kimbutolo kou-kopa sepena kalolemele kinia tondolo pa selemo mele pa serimu. Yunga ungumu no topa ungu nilimú mele ungu nirimu. 16 Yunga ki-lomekondo kombokandi yopoko-pakara ambolorumu. Opa seli lu-pulta ekendo ekendo pea nee mololimu yunga kerena perimu. Enane tondolo mongo takele selemo mele yunga kumbikeremo aku sipa none serimu.
17 Nane yu kanorundu kinia na yombo kololi none sélimu yunga kumbikerena sumbi sipu tamalu perindu. Kanu-kinia yuni yunga ki-lomekondo na ambolopa nimbale: “Nu pipili naa kolou. Na Kumbina ⸤Ye⸥mo Pe Akilipa ⸤Ye⸥mo. 18 Na Konde Mololi ⸤Ye⸥mo. U sika kolorundu-na-kolo kiniá na kamu konde molopo mindi púlimu molio kanumu. Na kololi ulu-pulumu kinia kololi yombomanga koleamo-tolonga kitolo ambololio.
19 Akumunga, nu kanokono mele semanema pepána tani. Ulu kiniá wendo olemoma kinia pe wendo ombá uluma kinia pepána tani. 20 Kombokandi yopoko-pakara kinia kou-gollone seli sepe-llame yopoko-pakara kinia kanonu akuma ungu-iku mele akumanga ungu-pulumu i-sipa: Kombokandi yopoko-pakara nanga ki-lomekondo ambolondu akuma na Karasinga yombo talape yopoko-pakaranga angelloma; sepe-llame yopoko-pakara akuma na Karasinga yombo talape yopoko-pakara.” ⸤nirimu.⸥