1 Tfit htiyakmoya wom nngrajohet mounmotr yura hefen yuhat fawihnamor. Gribt yak-hato ndt hmbrenamor hmbresham kanjo, yo mfha nmbuhakortko kkujift mfhat frhtfasmott, yo nyingatikt fnhumotr marr kanjo, yo wuraf hatoh-mo kaht memom nndo bngo bijhayef. 2 Nd mounmotr tefi skrorent bi yak nyimbusakafett tirt fakitohmor. Yo wuraf wom tirmif wurat marombt htamort, wom kindont yura bbinysoft htamort. 3 Wuraf inji htatahato mfro wafattormor laionm yattorwa kanjo. Nd mounmotrhu yattoreftpno 7-pela tohm yohnemom rroh mrokfo nmbu-hampno. Tohm nyungumoum mrokfom wanyakmoanm. 4 Nd 7-pela tohmpno niamo mrokfom memoya ka wandfa-ruhanm, tfit yura hefenko wom tngt kfo hany memota, “Nd tohrpno yakyuk mrokfom ni mirahn awandfakahtanm yima yima ahtimm. Nd mrokfom be tunhu yima yuhurpar arhutwam.”

5-6 Be nd mounmotr na htimor wura husf mano tektn wom wurat htamor yo mano bbinysoftn wom wura htamor, nd mounmotrn tir mift yura hefenko wuhta hanyhato nd toh nkifret Nkifrar, mounti nd mount rhuyuk shrkar hingrnamor yo nda bbinysofti ndar bbinysoft yorhwa shrkar yo marombti marombt yorhwa shrkar hingrna htamor, nd Nkifrarhu yufat yuta hanyhato nd mounmotr kfo memor, “Bi nda bbinysofti mounthu bnka yihayer. Bro Nkifrar nhai wom kukna hatohruhatr. 7 Nd 7-yuk moun-motrhu fumrrpno to be Bro Nkifrar turhu hingrna yima profetmpno kfo tndh hik buga duha yimo mrokfot nd yiha mfrwutha buganeraht.”* (10.7) Nda veskfothu wom kfo nuhas mrokfom. Bingot Bro Nkifrar kfo tndh nuhasmorm profetm ndar bbinysofti mount rhuruha nefm. Bro Nkifrar nhai kfo tndh hik buga nuhasrmorm. Be inji kfoni hanymourm. Profetm nd Bro Nkifrar kfo tndhni hanymo mrokfom wanymohat rom duka memoum, “To nda Bro Nkifrar kfiwa mrokfom to finji kanjo mfrfnahruhatm htiruhanomm?” Bok dukefmpno rhumom. Ndnettn nd 7-yuk mounmotrhu fumrrpno nd Bro Nkifrar kfo tndh furatamo tndhthu tndh mrokfot nd yiha mfrfnah bugarahm.

8 Nd hefen yuhat niayuk tngt tfit kfo memota, “Nd tekti bbinysoft wura htewa mountrhu tirt yorhwa yak nyimbusaket skrort warimaknt.” 9 Be na inji wanyhato yimoyann kfo ttiwon memoyanr, “Wahina nd skrorent.” Tfit ror kfo memora, “Wayakkahnt wayant. Afo tngt wuhtahato ye shombat mirahm nndo winepam kaum. Tfit yiro yatit nhai yakmiyakruhatt, yatit tfit yiho finy sinyaraht.” 10 Inji kfomotra nd skrorent yakmoyantn fiyaknimoyant. Afo tngt wuhtamohat hifa famot wine bupam kanjo. Yiyaf-moyantn tfit kto yironamoya yatit yiho finy bofinymota.

11 Tfit kfo memoma, “Tfit wom nfri profet mrokfom wawandfatwa. Bro Nkifrar ndar bbinysoft yorhwa kantrimi yo nd kantrim tohwa met yindarim yo kfo pthiwa wonk wonk yarmumami yo nd yarmumam kfiwa kmiroh kingm yak htaruha yuham, nd ndroh profet mrokfom wawandfatwa.”