Yuse chichame etserin Eliseo jakamtai, Israela nungkarin Yuse chichamen etserin Jonás naartin pujumiayi. Jonás Israel nungkanam pujamtai Yus niin chicharak:

—Jonása yamaikia wajakim, yakat Nínive tutainum weta. Nuni Israelchau ainau tunaarintin pujuinawai. Antsu ni tunaarin inaisarti tusam, wina chichamur nu aints ainamunam etserkata, —timiayi.

Yus tama, Jonás nu chichaman umirtan nakitau asa, juun entsanam jea, Jope yaktanam wemiayi. Nuni juun kanu nasejai wekain amia nuna nekas juuntan wainak:

—Winasha ayattiaram, —tusa nuni pachinkatas kuikian susamiayi. Tura kuikian susa juun kanunam engkemamiayi.

Tura juun kanunam engkema Jonás nitak kanurmiayi. Tura kanak pujai, kanu juun entsanam weamtai, Yus nasen kakarman nasenkat tusa akuptukam, entsa tamparak kanun intakratas awajmiayi. Tura asamtai juun kanunam engketinau mash shamkarmiayi. Tura shaminak warinchurin juun entsanam ujungkarmiayi. Tura ni yusri ainau yainmakarat tusar searmiayi. Tura waininayat ni yusri ainau nekasar Yuschau asar anturkacharmiayi.

Tura anturkacharam kanu nurinuri Jonásan kanú tepaun wainak shintarta tusa chicharak:

—¿Waruka kaname? Ame jakai tusam wári wajakim ami Yusrum seata. Turakminka wait anentramakka iincha uwemtikramrashtajiash, —timiayi.

Nunia aints mash untsuminak:

—¿Warukaya nasesha timiá kakarmancha nasentua? ¿Amesha tunia aintsuitme? —tu iniinam Jonás ayaak:

—Wikia Israel aintsuitjai. Yus nayaimpinam puja nuka juun entsancha tura nungkancha mash najanamia nuna inatirinjai. Antsu ninu chichamen umirtan nakitau asan juni engkemamjai, —timiayi.

Tura Yuse chichamen umitsuk engkemau asamtai, kanunam takakmin ainau mash shaminak:

—¿Waruka engkemamame? ¿Ju entsa miaaku wajasat tusar itiurkatjik? —tiarmiayi.

Tu iniinam Jonás ayaak:

—Wi Yus umirkachmau asa nasen timiá kakarman akupkayi. Tura asamtai juun entsanam wina ujunkataram. Nuniangka juun entsaka miaaku wajastatui, —timiayi.

Tamaitiat entsá Jonásan ujuutan nakitiarmiayi. Antsu kawi kawinmaka waketkiartatkamawar tujinkarmiayi. Antsu Yus iin kajertamkai tusar Yusen sear, nuniangka Jonásan juun entsanam ujungkarmiayi. Tura Jonásan ujungkaramtai, juun entsaka miaaku wajasmiayi.

Turamtai juun kanunam takakmin ainau Yusen mash shamkarmiayi. Tura yamaikia Yus umirkarmi, tu nintimrarmiayi.

Jonásan entsá ujungkaramtai, Yus juun namakan Jonásan kujarti tusa akuptukmiayi. Tura nu juun namak Jonásan takamchaun kujaramtai, kampatam kinta namaka ampujen jatsuk pujusmiayi.✡ Mat 12.40

Tura namaka ampujen pujus, Jonás Yusen nintimramiayi.

Tura Yusen seak:

—Apuru, wikia timiá shamakun amin seajme. Tura jakai tusan amin seau asamtai anturtame. Timiá kunanam wina ajapruwaramtai, juun entsa tamparamunam namak juruki. Wikia jakatatjapi tura jeemin timiá pengker aa nuni jeashtatjapi timiajai. Tu nintimsan pujai wainiatum, wina Yusur asam, tura wina Apur asam, wina jakai tusam uwemtikrurume. Tura wina uwemtikrurtin asakmin, ami wakeramurmin umiktinuitjai, —timiayi.

Tamati Yus juun namakan ataksha Jonásan entsa kaanmatkarin inukti tusa akupkamiayi.

Tura kampatam kinta nangkamaramtai, juun namak Jonásan kaanmatkanam inukmiayi. Tura inukam Yus nuwik Jonásan tímia nunisang ataksha chicharak:

—Jonása, yamaikia wajakim juun yakat Nínive tutainum weta. Wi tajame nuni Israelchau ainausha mash ujakta, —timiayi.

Tamati Jonás ayu tusa, nuniangka Yusen miatrusang umirkamiayi. Tura juun yaktanam Yuse chichamen etserkatas wemiayi.

Tura nuni jea chichaak:

—Juni tunaarintin ainau timiá untsuri asaramtai, kichik nantu nunia japchiri nangkamaramtai, Yus atumi yaktarin yumpungtatui, —timiayi.

Tamati aints ainau Yus tímia nuna nintimsar yutsuk Yusen searmiayi. Tura nu yakta apurisha aints ainaun chichaman akuptak:

—Yamaikia mash Yus nintimraram, umutsuk tura yutsuk pujustaram. Tura atumi tangkurisha yurtsuk asataram. Turaram atumi tunaari ukukrum Yus seataram. Turakrin ¿ii tunaarinka sakturmar iincha tsangkutramrashtajiash? —timiayi.

Tamati aints ainau mash miatrusarang Yusen umirkarmiayi. Tura mash umirkaru asaramtai, Yus nu aints ainaun wait anentramiayi. Tura ni yaktarinka yumpunkachmiayi.✡ Mat 12.41; Luc 11.32

Nunia Yus Nínive yaktanam pujuinau tsangkurau asamtai, Jonás napchau nintimramiayi. Tura kajek Yusen chicharak:

—Apuru, wait aneasam tsangkutrurta. Yaanchuik wina nungkarun pujusan amin pachisan: Nekas wait anengkratin asa, tewarikia kajechuitai. Tura asa Nínive yaktanam pujuinaun amuktaj tayat, nuniangka ataksha tsangkuratnuitai timiaja nuka nekasaintai. Tura asamtai juningkia winitsuk chikich nungkanam wetasan wakerukmajai. Tura asan yamaikia iwiaaku pujutan nakitajai. Ju yaktan Yus yumpungtatui timiaja nuka yumpungchau asakmin, ju waitruayi turutiarai tusan, natsaamakun yamaikia jakatasan wakerajai, —Jonás timiayi.

Tamaitiat Yus ayaak:

—Mia kajekmesha ¿nekas pengker nintimsamek pujam? —timiayi.

Tamaitiat Jonás yaktanmaya jiinki numichin charuk aakmakmiayi. Tura mikinchinam keemsan, Yus itiurkatpi tusan yaktan jiij pujurtiajai, tu nintimramiayi.

Tura tsaa nukap sukuamtai, Yus Jonásan wait anentar mikinunam pujusti tusa numin tsapamtikmiayi. Yus turamtai Jonás maaketai tusa warasmiayi. Antsu kashin tsawaar kamau numi kangkape yuwat tusa Yus akuptukmiayi. Turamtai tsaa sukuam numi nuké kakarmachu kaarmiayi. Nunia Yus nasen tsuweran akuptukmiayi.

Tura tsaa sukuam, Jonás jakatas wakerimiayi. Tura chichaak:

—Wi jakanka ¿timiá pengker achainjash? —timiayi.

Tamati Yus chicharak:

—¿Waruka numisha kajerame? —timiayi.

Tama Jonás ayaak:

—Ja ai, mia kajeku asan jakatasan wakerajai, —timiayi.

Tamati Yus ataksha chicharak:

—¿Ju numi ame araachiatum ningki kashi tsapain wainiatum, nunia jumchik arus ataksha kaaru wainiatmesha waruka waitcha anentame? Antsu ju yaktanam ciento veinte mil (120,000) pengker aa nuna nekainachu tura pasé aa nunasha nekainachu ainau wait anentsuk pujamin, wikia ju yaktanam pujuinaunka wait anentajai, —Yus timiayi.