4
Ju̱denu diy samirya vuryiva si̱tenu vu̱tyuva̱chodamu daryatiy savichadedani̱ Avurá̱bantyi
1 ¿Ta̱rana̱ vurya̱jtay sanchiy vu̱myunatyi̱ Avurá̱bay, ta̱ra? ¿Ta̱ra sasaryeda niquejada jto̱tadedamusiy, ta̱ra? 2 Saryityi jteda Ju̱denu sami̱ sivaayada murichirya dayu, saryi jchana̱tya variyu, ne ji̱ta Ju̱denu diya. 3 ¿Da nu̱tyura ranique Ju̱denu nu̱chara ranchiy, nu̱tyura? Ranique: Satuva̱choda Avurá̱bay simu Ju̱denu, sadiyada variy samirya siva.
4 Yinu̱y, ne vu̱myurichenusara mityamusiñi̱ jvaañu; vu̱charanu ji̱ta nurirya vu̱dyivyi sivaayada murichiryayu. 5 Saju̱ ji̱ta, ni̱timyu̱ ne niquejada jto̱tadedamusiy sivaay tara, su̱teda Ju̱denu sami̱ variñi̱, satuva̱chodamu sa̱jtay sami̱ variyu, jiryatiy darya savicheniryu̱y samirya ni̱ jamirya vichara, sa̱tidye tuva̱chu variy simu. 6 Daryatiy su̱teda ta̱riy Judíyuveda curaca Davyíbe ranchiy: Jiryatiy sadiy Ju̱denu samirya vichara siva nijya̱mi̱ dañumamu̱y ne sa̱cha sami̱, saju̱ saranuma̱ daryaju̱ darya, jiryatiy sa̱cha Ju̱denujsa̱ ta̱richa̱ra̱ju̱. 7-8 Su̱teda varintyi:
Ju̱denu jmu̱tyasavay ji̱ta riñi̱cha nijya̱nvay jiryatiy saramityaniy Ju̱denu ruuvara va̱cha jvaayada, samutadoda varirya rijyuuchuveda samiy ti̱ta̱ju̱ yajisiy. Si̱chana̱tyi̱si̱ ji̱ta nijya̱mi̱ jiryatiy saparu̱mya̱ Ju̱denu siva, ne sa̱jachipityaja̱sara saju̱ nu̱ndyerya jijyuuchuveda nu̱ndye.
9 Jirya jchana̱yada ji̱ta, ne vinu Judíyuvedaju̱ darya, jivyejyu̱ jarye jiryatimyu̱ ne Judíyuveda daryi. Tapi vuryi̱tay Ju̱denu jteda sami̱ni̱ Avurá̱bay satuva̱chodamusiy. 10 ¿Nu̱tyuramu su̱teda daryani̱, nu̱tyuramu? su̱mutyonusa̱damu, varimyatamu̱y ne su̱mutyonusa̱damu jivyicha̱da didye. Su̱teda ji̱ta jiryatimyu̱ ne jmutyonusi̱ didyeñi̱. 11 Su̱mutya̱jada ji̱ta Avurá̱barya jmutyododa, rirya̱tidye datya nijya̱nvay ramusiy: Su̱nu̱y Ju̱denu samirya Avurá̱ na̱cho̱ jityuva̱chodamusiy, yimutyonusa̱dajisiy. Sivaayada Ju̱denu nu̱ryara, sa̱tidye vicha̱siy Avurá̱ rimyunatyi̱ ti̱ta̱ju̱ rityi tuva̱chu simu Ju̱denu jiryatimyu̱ ne jmutyonusavay riñi̱cha didye, sa̱tidye jtay samivye varintyiryi. 12 Sava̱ta̱da Ju̱denuntirya, sa̱tidye vicha̱siy Avurá̱ rimyunatyi̱ jmutyonusi̱, rityi ne vinu jmutyonusavadyeryi, richiityari̱sara varintyidyerya su̱muntidye, vu̱myunatyi̱ Avurá̱ jmu, jiryatiy sarupi Ju̱denu nú̱va jityuva̱chodamu yimutyonusa̱dajisiy.
Ju̱denu jteda ya̱sa̱ñi̱ Avurá̱bay mucadi ti̱ta̱ju̱ sadadyeñuju̱
13 ¿Ta̱raju̱ su̱teda Ju̱denu Avurá̱bavya, ta̱raju̱: Ra̱day sa̱y mucadi mitya ji, rasu̱tyerya sa̱ra̱ju̱, jidyedyeñuju̱ jarye?
Ne su̱teda siva ramusiy, jiryatiy sito̱tadedara saniquejada daryaju̱; ramusiy ji̱ta su̱teda daryá, jiryatiy Avurá̱bay tuva̱choda samirya simu. 14 Tapi riryivyidye jmutya̱ra mucadi rityi jto̱tanicharara niquejada, ne taraju̱ nu̱ndyerya vu̱tyuva̱choda variñu̱ndye, rama̱cho̱ mitya variy su̱teda Avurá̱bavyantiy. 15 Ne yinu̱y Ju̱denu niquejadamusiy ra̱cha va̱cha vichadeda, vuryito̱tanitya daryaju̱ra. Jasityimyu̱y ne tara jna̱y Ju̱denu niquejada, dantyamu̱y ne ravichasara juuchuveda variy. 16-17 Ramuni̱tiy vuryi̱mutya̱ vinu vu̱tyuva̱chodamusirya Ju̱denu jteda, sa̱tidye sa̱y mitya vu̱rya. Vu̱dyetya variy: Su̱teda ra̱chasara ti̱ta̱ju̱ Avurá̱bay dadyeñuju̱, ne vinu rijyu̱ jiryatiy ru̱mutya̱jadara saniquejada, rijyu̱ jarye ji̱ta rityi tuva̱chu, daryatiy satuva̱choda Avurá̱bay, ni̱tiy vichasara munatyi̱ vu̱jyu̱ ti̱ta̱ju̱, darya nu̱chara Ju̱denu jteda siva Avurá̱bay:
Rabemya̱ rajuu nijya̱nvay munatyi̱ju̱ ji.
Daryamusiy savicha̱da Avurá̱bay vu̱myunatyi̱ sadiya Ju̱denu, jiryatiy satuva̱choda daryaju̱ simu, ni̱tiy datya mi̱sadeda diibyimusiñi̱ nijya̱mi̱, jadchintyi sadatya tu̱choda taranchiy nu̱tyu ju̱desaranuma darya, jiryatimyu̱ ne ju̱desara didyerya. 18 Avurá̱bay ji̱ta jiriryi̱jadara tuva̱choda simu nu̱tyu ti̱tiy saryicha ta̱rimya̱ saryipyaru̱yada riva, sa̱tidye vicha̱siy variy rajuu nijya̱nvay munatyi̱, daryani̱ rani̱cha raniquesa̱da:
Darya rirye̱chasara jidyedyeñu, nu̱tyu jdarichijyuu rajuu.
19 Ne saparu̱ryu̱yada nta variy riva Ju̱denumu tuva̱choda, jasiñuma sajachipiya̱jada variy ramusiy detuyadaju̱, dañuma sani̱cha̱da jaryi rimyityu, taraqui pacha nijya̱tuunuti̱numa daryaju̱ dañi̱. Dantyamu̱y ne saparu̱ryu̱yada riva tuva̱choda sajachipiya̱jadanumatiy sanchiy jivyatura Sára detuyasa̱. 20-21 Satuva̱choda jivyanu̱yadata ramu Ju̱denu niquejada jiryatiy sani jteda sivara, ra̱sa̱yada satuva̱choda varidye, si̱chana̱tya̱da risa̱ju̱ni̱ Ju̱denu, sadatyama̱ daryaju̱: Si̱tenu datyara ni̱day Ju̱denu, sa̱jto̱taniy varirya yiteda. 22 Ramuni̱tiy su̱teda Ju̱denu sami̱ni̱, satuva̱chodamu. 23-24 Ne vinu saju̱ ravichanu̱yada nu̱chara jiryatiy su̱teda Ju̱denu sami̱ satuva̱chodivayu: vu̱jyu̱ jaryentiy, jiryatiy vu̱tyuva̱chu daryaju̱ simuntidye, ni̱tiy mi̱sadeda diibyimusiñi̱ Vu̱yntyityu̱ Jesús. 25 Ni̱ni̱ batyeda vu̱cyarayada jiyadaju̱, sami̱sa̱danumatiy vu̱ryetyemya̱ variy saju̱.