1 Ra̱nique tamitya jiryivara, ratyeryi̱veda, jirya̱ntya jchana̱y simuju̱ Nutyityu̱. Ne paru̱tya̱damusiy rajetyi nu̱yadara darya niquejadantiy, jiryejyu̱ ji̱ta samirya darya.

2 ¡Jiryi̱nu̱tyata̱ta rirya̱jisiy jivye nibyimiyu! ¡Jiryi̱nu̱tyata̱ta rirya̱jisiy jivye va̱cha datyanuvayu! ¡Jiryi̱nu̱tyata̱ta rirya̱jisiy jivye jivyu̱ nusiye̱yadacanumintyiyu, rityi jmutyonutadedara jivyu̱ Ju̱denuju̱! 3 Tapi vu̱ñi̱ ji̱ta saranusavay Ju̱denuju̱ vu̱tyi jachipiya̱ si̱tenu sanijyu̱, si̱tenu vu̱jechitya, vu̱tyi jchana̱tyasarani̱ Jesucrístu, vu̱tyimyu̱ ne tuva̱choda ramu vu̱vyicha̱da vuryeyada ra̱yadaju̱, vuryivaayadamu jarye ne vu̱tyuva̱choda. 4 Ray ji̱ta tuva̱chu jaryi ramu ravyicha̱da, rivaayadamu jarye, rayada ra̱yadaju̱. Ti̱tiy jtay jityuva̱chu ramu, ray ji̱ta jaryiñu̱va̱ju̱. 5 Su̱mutyonutadedate rajye̱betyera ravyu̱, mumurundamiñijyatemusiy raryupedivasiy. (Ramusiy sadityadoda rajye̱betyera: “Radyenu ji̱ta Judíyute day.”) Jadchiy ji̱ta Irayénu nijya̱mi̱ darye, jiryatiy savichanu̱yada ramyunatyi̱ Irayénu, ri̱riiñu ji̱ta Myi̱ja̱mí̱, jiryatiy Irayénu denuni̱, samiy datyasi̱. Nu̱tyu rajye̱benta rañiquera Ebrévu niquejada, rariryi̱jadantirya ta̱riy rajye̱be vicha̱dantiy. Muyisésibe jtedamu ji̱ta ratyuva̱choda samidye, nu̱tyu ridyetyadoda Varyiséyuvedara. 6 Ju̱denuju̱ rivaaryu̱yadamute, rayasantanumaya̱jada riy Jesúsmu tuva̱chuvay, mitya ri̱teda Ju̱denu mityasivyeda daryi. Samirya vichasa̱damuntiy, jiryatiy ta̱riy sadatyadoda Muyisésiberya, rito̱tanimya̱ ti̱ta̱ju̱ra. 7 Jirya ti̱ta̱ju̱ jiryatiy samirya ravichanu̱yada jaryi rajyu̱, rajechipumya̱ varicha̱ra̱ju̱ darya, Crístu jiyasachiy rajechipurya. 8-9 Si̱tenu ji̱ta rajechipuy ti̱ta̱ju̱ra, ra̱tidye datya samiñi̱ Jesucrístu, ni̱tiy rayntyityu̱. Rani̱ ji̱ta samirya si̱tenu ti̱ta̱ju̱, ne tara ntate rasa̱ra̱ nu̱ndye. Crístu jiyasachiy ra̱ntyuyada ti̱ta̱ju̱, nu̱tyu rujyuu jatyasara ri̱nu̱y rana̱cho̱, ra̱tidye ca̱na̱ñi̱ Crístu, rayada ra̱yasi̱ju̱, sa̱tidye diy Ju̱denu jidchavu̱ sisa̱ju̱ Crístu variy riva. Ne ravya̱ta sa̱diy samirya vichara riva, vinu jiryatiy ratyuva̱choda radyirya su̱tedamu, jiryatiy Muyisésibe datyadodara. Daryaday ravya̱ta sa̱diy samirya vichara riva, jiryatiy ratyuva̱choda simu Crístu, jiryatiy Ju̱denu sa̱y vu̱rya samirya vichasara, vu̱tyuva̱chunumatiy simu. 10-11 Ramusiñi̱day radyetyaru̱y samiñi̱ Crístu, daryaday radyetyaru̱ntyidyerya Ju̱denu datya̱dantidye, ratatiy sami̱sadeda diibyimusiñi̱ Crístu, daryaday ra̱paru̱tyajaya̱sara rayaru̱ryamuntidyerye, jiryatiy sara̱yada Crístu paru̱cha̱rimyusiy vuryeyadantidye, jaryi radyiiryu̱y variy nu̱tyu sadiiyada Crístu daryantidye, ratyi saryesara varirya raryi mi̱sa darya diibyimusintyidye.

12 Ne raryi didyerya samirya vichasara rimuju̱ didye, ne rito̱ ramu juuchajsa̱ vicha̱da didye. Vani̱rava̱ju̱ jaryi raryiryu̱rya jirya samirya vicha̱da rajyu̱, ne yinu̱y ramuju̱ sireda Crístuntirye. 13-14 Ratyeryi̱veda, ne ri̱tay tara: “Ririmya̱ rajyu̱ra samirya vichasa̱da.” Ri̱tatye ji̱ta: “Rajechiputyityirya rivaayada, ri̱sijyu̱numa darya, vani̱ra ri̱nta rana̱cho̱ ray jiryatiy rasu̱tye rivaayada rajyu̱, ra̱tidye ju̱riy varenuva̱ju̱ra ravya̱tara, samirya vichasara, ra̱tidye jmutya̱ variy Ju̱denumusirya samurichedoda, jiryatiy sa̱natuy variy jarichumuju̱ ray, Jesucrístu ra̱yadamuju̱.” 15 Ja̱myityi jirye̱cha Crístumu tuva̱chodamu, daryaday jirya̱jachipiya̱ntidye. Tajityi jirya̱jachipiya̱ varidye, ranchiy ji̱ta sa̱dityanu Ju̱denu jiryivayu. 16 Dañuma rumutiy vuryito̱jada samirya vichasa̱damu, vurya̱siityari̱ra darya vicha̱da varintyi.

17 Daryani̱ jirya̱jvaayasiy rañiya̱reju̱ntidye, ratyeryi̱veda, daryatiy rivaayada ta̱rintyidye. Jirya̱jnu̱yasiy samiryi, rityi vichanu̱jeya̱ nu̱tyu nu̱vyicha̱da daryantiy, jirya̱tidye datya variy: “Nu̱rya ra̱jvaay.” 18 Nu̱tyu ratyu̱chujaya̱jada jiryivara, ra̱jatyi tu̱choda jiryivantirya, ri̱na̱yadanube ratyu̱chura: “Jaryi rajuu rivyichasara Crístu crusiy mityasivyeda.”

(Jiryatiy sabatye Crístu crusitya̱sa vu̱jyuuchuveda jiyadaju̱, ranchiy vu̱dyetya: “Ne samirya juuchuvedamu vicha̱da.”)

19 Jivye crusiy mityasivyeda ji̱ta batyi̱savadye, tapi vinu ripyudenijyu̱ jijechipiya̱ Ju̱denu jiyasachidye, riichana̱tya variyu, varityi ruvaarya jadasarate day, rijechipiya̱jada ranijyu̱ mucadincha vicha̱da.

20 Vu̱vyicha̱da ji̱ta jarichumu day, rumusiñi̱ ji̱ta vurya̱nutuñi̱ vuryeyada ra̱yasi̱, jiryatiy Vu̱yntyityu̱ Jesucrístu dañi̱. 21 Ni̱ni̱ ji̱ta ra̱ti̱tunura vu̱vyu̱rapu̱rya, nu̱tyu savu̱tiy daryantiy, vandavu̱, ne diiyasavay vurye̱chasara variñu̱day. Sa̱ti̱tunura vu̱vyu̱ jidyetya̱data, ratatiy sa̱saboniy ti̱ta̱ju̱ jijyu̱ra.