1 Yahovola itala yeele ilapo ele, toko weracilyaya ukati wa Aparahamu. Phimaana Isaki ahorwaa ilapo yo Kerari, wonwo Apimeleke waaryawe mwene o mafilisitiya. 2 Vano Mwaneene Nluku ahomphwanya Isaki ni ahomwiirela: Uhikhuruwele Wiciipitu. Urwee wakhale ilapo inhalaka wuthoonyera. 3 Ukhale ila ilapo ela, mi kinaakhala ni we ni kinawureeriha. Kontha we nuucuulu aa uyo kinaahala wuuvahani ila ilapo ela, ni kinarwa uttharihelela yolumacenryaka athumwaninyu aneehaniya Aparahamu.

4 Kinaahala wuncerera ucuulu aa toko itthoottwa co wirimu ni waavaha nnya ilapo nnya cothene; ni nhina wo ucuulu aa atthu othene omwiilaponi anaahala ureerihiya,* Mphattuwelo 22.16-18 5 kontha Aparahamu hosunka malamulo aka inrumilyaka ni isariya caka.

6 Commo Isaki ahokhala o Kerari. 7 Vano alopwana o nenno nipuro nno ukati waankohilyaya wiira ala phamwaaraa, ule ahaakhula eeraka: Mwanrokoraka. Anawoova uhimyaca wiira amwaaraka, kontha oopuwela wiira, alopwana o yeela ilapo ela anaahala ukiiva nlattu wa Repeka, kontha ahotepa ooreera.

8 Isaki ahokhala o Kerari ukati mwinci. Nihuku nimoca, Apimeleke, mwene o mafilisitiya, anawehecesa wacanelani yaari uculu, phuukati wamonnyawe Isaki anthwelanaka Repeka amwaarawe. 9 Vano Apimeleke ahomwiihana Isaki ni ahomwiirela: Khweeli, uhirune. Ale amwaaraa. Vano weerelani mwanrokoraka? Isaki ahaakhula eeraka: Kontha kineenre amwaaraka kanawoova wiiviya. 10 Apimeleke aheera: Unipankenleni commo? Kontha nlopwana phi nlopwana uyo aanawaarupana amwaaraa ayo, ni wananiwiihera ikoosi. 11 Vaavale Apimeleke ahaahimyacera atthu othene eeraka: Ntthu nohala umwiiriha itthu ula nlopwana ula atthuna amwaarawe ala, naahala ukhwa!

12 Vano Isaki ahotthimpula imatta ni yooyo mwakha uyo ahoruwerya venci, kontha Mwaneene Nluku ahonreeriha. 13 Ule ahothaciri ni nhakhu awe wahoncererya mpaka ahothacireeha. 14 Ahaana ikhontwaa ni imope cinci ni ipottha cinci mpaka mafilisitiya upacera unrama. 15 Phimaana, mafilistiya yahotthunttuwanihaca nuuwuhelelaca iluusi cothene cathipiye ni ipottha ukati wa Aparahamu, athumwane Isaki.

16 Vano Apimeleke ahomwiirela Isaki: Ukhume mwilaponi mwihu mu, kontha uri ntthu oonhakhu cinenne woonipwaha hi. 17 Phimaana Isaki ahokhuma nuthamela wuuthakoni wo Kerari waakhalawe khalayi. 18 Wahoolo Isaki ahowuhulaca iluusi caathipiye ukati wathumwane. Nnye cawuhelelaciye ni mafilisitiya ukhwa wawe Aparahamu ni ahovaha macina yavahilyaya athumwane. 19 Vano ipottha ca Isaki cahothipaca muuthakoni mmwe ni cahottenla maasi menci oociva. 20 Vano ahakheli o Kerari yahonyakulihana na ahakheli a Isaki, yiirelanaka: Maasi ala awihu! Phimaana Isaki ahovaha iluusi ile ncina na Eseke, nlattu woonyakuliheraninya. 21 Vano ipottha nnye cahothipaca iluusi ikina, ni ile yahonyakuliheraniya. Phimaana aheehana Sitina. 22 Wahoolo Isaki ahothama nne nipuro nne ni ahothipa iluusi ikina ni khayanyakuliheraniye tho. Phimaana ahovaha ncina na Riyopoti, eeraka: Vano Mwaneene Nluku honihulela ikhato ninaahala wiithawala yeela ilapo ela.

23 Ukhuma vaavale Isaki ahorwaa o Peresepa. 24 Yoole uhiyu ule, Mwaneene Nluku ahomphwanya ni ahomwiirela: Mi kiri Nluku a Aparahamu athumwanaa. Uhoove, kontha kiri ni we. Mi kinaahala wureeriha ni wuncerera ucuulu aa mwanlattu woofenta karumeya aka Aparahamu.

25 Isaki ahoteka ikhilompi ni aholapela ncina na Mwaneene Nluku. Vaavale ahomaka ni ipottha cawe yahothipaca iluusi ikina.

26 Yoole ukati ule, Apimeleki ahowa akhumaka o Kerari wamoca ni Awusate nlakakano awe ni Fikoli, muulupale aanakhotto awe. 27 Vaavale Isaki ahaakohaca eeraka: Nlattuni mmwaaka ukiweha, mi mwahokipanka mwiinani ni mwahokoomola? 28 Ale yahomwaakhulaca yiiracaka: Kontha nihowoona weekhweeli wiira Mwaneene Nluku ri ni we, phimaana niiraka: Nrwee nilupelace we ni hi. Nimphavela waatana ni we. 29 We uhinipanke yoonanara, toko hi cihupankileehu itthu, nanso nihoopanka ratta ni wuleeha wo mpuha. Vano nihocuwela wiira Mwaneene Nluku hooreeriha.

30 Vano Isaki ahaavahaca yoolya ni ale yaholyaca nuuwuryaca. 31 Usa waya oyeeli yaholupelihana. Isaki ahaalehaca ni ale yahorwaca ni mpuha.

32 Nenno nihuku nno ipottha ca Isaki cahowaaca unhimerya ciiraka: Iluusi yathipehu iyo nihottenla maasi! 33 Isaki ahovaha iluusi ile ncina na Sepa, phimaana mpaka nihuku nolelo, ile iparasa ile icuweliyaka ncina no Peresepa.

34 Isawu naphihenrene myakha arupayini ceyarelo ahonthela Yutiti, mwana a Peeri, nhitita, ni ciicammo ahonthela Pasimati, mwana a Elomi, nhitita. 35 Ale asithiyana ale yahaacukulihaca Isaki ni Repeka.