1 Kurak Kanaanshuch yakat Aradush yapeem zar puwachingaru tuwash, Kanaanshuch tputs yaktarini Arad sura, apusap tsap Neguebash taarangiya. Anshuch yakat kurak k'kuzee mazinarangu tárangiya; Israelchich tputs naakatssincha, Atarimap ngootsi, tárangu, wasundurureetssha, Pzaya, iyaama pachayani, táranganaya Israelchicheetsi.

2 Ashiriya, Israelchichshitisin Apanllee masharanganaya. Apaa, shiy iyaa Kanaanshuchee kasimaam istakchinaareesha, izuuru tputsee tpachingayani, táranganaya. 3 Apanllsha anoo mazinarangu kapung Israelchicheem istarangiya. Kanaana tsap ashpari tpachingarangiya. Ashiriya, Israelchichshitisin pacharangusin, Kanaanshuchee tputs ashpari kachingaranganaya. Ashirucha, amb ashirangsin uwshtisin anoo tsap sur Hormaa ísamaranganaya, Tpachingama, táranganaya.

Ashiriya na kamaneena yuwaa Israelchich tputs Kanaanshuchee kachingamaam masharangana anootsi.

4 Hormash shitungeerantssin, mus chumbeepimaship naayarandsin, Edomaa tsap tushiymaam punirangusin, arapsha iturpiyarusin, imaruranganaya. Ashirucha, Móysisarini tiptsir arap ngoots imarurangsin, kiyung kachiyarangsin, mantsir mangush chinaranganaya. 5 Yuw waana zandkana anootsimsha mantsir tsiyataranganaya. Apanllee, misha Móysisaatstamta táranganaya; ¿Mayaamsha Apanll misha Móysis iyaa Ijiptosh tsap kis taaranguni, iyaa anush tsap ishitungaranga? Waani machip tsap apusap tsipanllina tupsinaya, iyaa Ijiptosh tsap ishitungarangiya. Waj, ningeem tsap kungoowtaa, misha katungamamta nduneewawa. Neetsimarisha katungkuni, ichingaru zar ndusha kaapa kis katungkiniya. Kanizeenllshatanicha, tárangusin, zapan mantsir tsiyataranganaya. 6 Apanllsha anumand mkaa kasumash zanganirangiya. Maksha tputsee zapan kapuxta kapuxta ashirangu, zapan tputs Israelchich tsiparanganaya. 7 Ashirangsin, Móysisangaz tputs kusaranganaya. Kuseersin táranganaya; Móysisaa, itsinsaru kamanchinllpa. Iy yutaritshishish pantsaranginiya. Apanllee mantsir tsiyataranganiya. Shiyaatstam tsiyatarangani. Anumandpari Apanll iyaa waneekiya. Ashiriya, shiysha Móysisaa, Apanllee mashangi. Iyaa nda tpachingamaam mak ndusha iyaa kapuxamaama, arapsha mkaa zanganimaama, tárangiya. Móysissha anuritam Apanllee masharangu, 8 Apanllsha, Móysisaa, shiyshat ngusambaa yáyarush, mkaam amuy tamapari ashiritam tinangcha. Tinayarush, yasinamun tapamtayarush, pashuchunlla. Pashucheerush, tamamaatsimasaja tputs mak kapuxkachiya, uwshat ngusamb mkaam tinamaa tasaseeru nachayaru, nap ashkachu, anumunari yarchiya. Anumun waanaatsi tapachindachinllinaya, tárangiya. 9 Ashiri Móysissha ngusambaa yáyru, mkaam tinarangiya. Tinayaru, yasinamun tapamtayaru, pashuchurangiya. Tputsee mak kapuxkachu anuritam iriputanusin, anoo ngusambaa mkaam tinamaa tasaseersin nap ashkatssin, yartaranaya.

Ashiriya, na kamaneena yuwaa Apanll Israelchichee yuwamand kukoo kapeetarangana anumand mkapa waneerangu, Móysissha ngusambaa mkaam tinayaru, anpat tapachindarangu anootsi.